Amérika diniy erkinlik komitéti ezaliri qeshqerni ziyaret qildi


2005-08-21
Share

Uyghur élide ziyarette boliwatqan amérika diniy erkinlik komitétining wekiller ömiki ürümchidiki ziyaritini axirlashturup yekshenbe küni Uyghur élidiki 3 künlük ziyaritining axirqi békiti bolghan qeshqerge keldi. Ular bu yerde héytgah meschitini ziyaret qildi hemde meschit imamliri bilen söhbetleshti.

Muxbirimizning qeshqerdiki héytgah meschitidin igiligen uchurigha qarighanda, amérika xelq'ara diniy erkinlik komitéti wekilliri bu yerge, qeshqerdiki Uyghur hökümet rehberlirining hemrahliqida yekshenbe küni chüshtin kéyin yerlik waqit sa'et 3 lerde kélip, meschit ichini ziyaret qilghan hemde meschit imamliridin jüme damollam, abduqadir qari hajim we emet qari hajim qatarliqlar bilen körüshken.

Melum bolushiche, ular héytgahda 5 yérimlarghiche ziyarette bolghan. Shundaqla amérikiliq wekiller qeshqerdiki ziyariti dawamida yene, qeshqer wilayetlik islam mektiwinimu közdin köchürgen.

Uyghur élidiki ziyaritini 19 - awghust yeni ötken jüme küni bashlighan bu ömek, qeshqerge kélishtin burun ürümchide bolghan. Amérika xelq'ara diniy erkinlik komitétining yardemchi tetqiqatchisi mindiy larmor (Lindy Larmore) xanim bu seperni bashlashtin burun, erkin asiya radi'omizning ziyaritini mexsus qobul qilip, ularning ürümchidiki ziyaritide Uyghur aptonom rayonining re'isi ismayil tiliwaldi bilen hemde aptonom rayonluq diniy ishlar komitétining mudiri, jama'et xewpsizlik idarisining bashliqi, Uyghur éli ijtima'iy penler akadémiyisi din inistitutining mudiri qatarliq hökümet erbabliri bilen körüshidighanliqini bildürgen idi.

Gerche bu ömekning xitaydiki ziyariti bir heptidin buyan dawam qiliwatqan bolsimu, lékin xitay metbu'atlirida we Uyghur élidiki her qaysi metbu'atlarda hazirghiche bu heqte héchqandaq xewer bérilmidi. (Peride)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet