Мәркизи ахбарат агентлиқи: шинҗаңда уйғур яшлириниң мәсчиткә киришигә рухсәт қилинмайду

• 
  2006-02-02

Тәйвән мәркизи ахбарат агентлиқи пәйшәнбә күни хәвәр елан қилип, 11‏- синтәбир вәқәсидин кейин хитай һөкүмитиниң уйғур аптоном районида 18 яштин төвән уйғурларниң мәсчиткә кирип намаз оқушини пүтүнләй чәклигәнликини билдүрди.

Хәвәрдә тәкитлишичә, хитай һөкүмити 11 - синтәбир вәқәсидин кейин террорлуқ вә диний әсәбийликкә қарши турушни баһанә қилип, шинҗаңда уйғурларниң ислами етиқад әркинликигә зиянкәшлик қилмақта. Мәркизи ахбарат агентлиқи, " җуңгониң шинҗаңда йолға қойған асаслиқ усули 18 яшқа тошмиғанларниң динға етиқад қилишиға йол қоймаслиқ, намаз оқушини чәкләштур " дәйду.

Хитай асасий қанунида пуқраларниң диний етиқад әркинлики бар, дәп бәлгиләнгән болсиму, әмма хитай даирилири 11 - синтәбир вәқәсидин кейин уйғур аптоном райони бойичәмәхсус уқтуруш чиқирип," он сәккиз яштин төвәнләр, аяллар, дөләт - ишчи хизмәтчилири, партийә әзалири"ниң мәсчиткә кирип намаз оқушиға болмайдиғанлиқини елан қилған.

Мәркизи ахбарат агентлиқиниң әскәртишичә, райондики һәр қайси мәсчит имамлири һәр күни намазға кәлгән кишиләрниң йеши, җинси, хизмити вә намазханларниң сани тоғрисида һөкүмәт даирилиригә мәлумат бериши керәк икән. Мәркизи ахбарат агентлиқи, " бу хил көзитиш мәсчиткә баридиған уйғурларға зор роһи бесим шәкилләндүрүп, мәсчит имамлири билән мусулманларниң мунасивитини йирақлаштуруш ролини ойнимақта "дәйду.

Қәшқәр һейтка мәсчитиниң бир имами илгири бу сиясәтни ақлап, " яшларниң намаз оқушини чәкләш уларниң дәрсини яхши үгиниши үчүн" дегән иди. Хәлқара кишилик һоқуқни көзитиш тәшкилати өткән йили елан қилған уйғурлар һәққидики доклатида, хитай һөкүмитини, ислам диний уйғурларниң милли кимлики билән зич мунасивәтлик дәп қарап, уларниң диний етиқадини чәклимәктә, дәп тәнқидлигән. (Әркин)