Уйғур аптоном районида йәр асти хиристян черкавлириға қарши тазилаш елип берилған


2006.03.24

Мәркизи америкиниң тексас штатидики җуңго ярдәм җәмийити, дәп атилидиған бир хиристян җамаәт гуруһиниң йеқинда ашкарилишичә, хитай даирилири өткән айда уйғур аптоном райониниң 11 наһийисидә йәр асти хиристян черкавлириға қарши тазилаш елип берип, бу наһийиләрдики йәр асти хиристян диний җәмийәтлириниң он нәччә нәпәр юқири дәриҗилик рәһбирини қолға алған.

Җуңго ярдәм җәмийитиниң әскәртишичә, қолға елинған йәр асти черкав рәһбәрлириниң көп қисими кейинчә қоюп берилгән болсиму, лекин аз сандики бир қисими йәнила тутуп турулмақта икән. Хитай асасий қанунида хәлқниң диний ибадәт әркинлики капаләткә игә, дәп көрситилгән болсиму, лекин бейҗиң даирилири һөкүмәткә тизимға алдурған диний җәмийәтләрниңла паалийитигә йол қоюп, тизимға алдурмиған диний җәмийәтләрни " хурапий гуруһлар" яки " қанунсиз диний паалийәтләр " дәп әйиблимәктә иди.

Йәр асти хиристян җәмийәтлири уйғур аптоном районидики хитай көчмәнлири ичидики хиристян муритлири арисида бир қәдәр көп болсиму, лекин йеқинқи йиллардин бери уйғурлар ичидә аз болсиму мухлиси көпийиватқан динларниң бири болуп һесаблиниду. Пуқраларниң диний әркинликини бастуруш америка башчилиқидики ғәрб дөләтлирини вә хәлқара кишилик һоқуқ тәшкилатлирини әндишигә салмақта иди.

Президент буш өткән қетим бейҗиңни зиярәт қилғанда бу мәсилидики әндишисини оттуриға қойған. Ху җинтав келәр айниң 20 - күни вашингтонда президент буш билән учришиду. Буш, ху җинтав билән диний ибадәт әркинликигә һөрмәт қилиниш керәклики қатарлиқ хитай кишилик һоқуқи хатирисигә ятидиған бир қатар мәсилиләрни музакирә қилиши мүмкин. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.