Хитайда имам - хатипларға лаяқәтлик кинишкиси елиш өлчими қоюлди


2006.05.12

Бейҗиң һөкүмити мәсчиткә имам - хатип болғучиларниң буниңдин кейин һөкүмәт бәлгиләп бәргән шәртләр бойичә лаяқәтлик кинишкиси алмай туруп имам - хатип болушини чәкләйдиған йеңи бәлгилимә чиқарди. Бәлгилимә бойичә мусулманлар имам - хатип болмақчи болса чоқум еғизчә вә язмичә имтиһанға қатшиши вә лаяқәтлик кинишкиси елиши керәк.

Бәлгилимидә көрситилишичә, йеши 60 тин ашқан вә узундин бери имам - хатиплиқ қилип келиватқан диний затлар бу бәлгилиминиң ичигә кирмәйдикән. Лекин бәлгилимидә имам - хатипларниң " қанунларға бой сунидиған, ислам диний иниститутини пүттүргән яки мунтизим мәдрис тәрбийиси вә тәң дәриҗилик сават алған, қурани - кәримни қаидә тәләппози бойичә ядлиялайдиған кишиләр" болуши тәләп қилинди.

Җуңго ислам җәмийитиниң пәйшәнбә күни бейҗиңда ахирлашқан мәмликәтлик вәкилләр қурултийи " ислам диний хадимлириниң лаяқитини бәлгиләш усули" , " ислам диний паалийәт сорунлириниң диний хизмәтчилирини вәзипигә тәйинләш усули" вә " мәсчит башқуруш усули" қатарлиқ бир қатар қаидә - түзүмләрни мақуллиған. Бу бәлгилимиләрдә мәсчитләрниң илкидики йәр - земин, өй мүлкини шу җайдики земин башқуруш идарисиға тизимға алдуруш вә гуванамә елиш тәләп қилинди.

Хитай диний сорунларни контрол қилиш, диндарларниң диний паалийитигә чәклимә қоюш, ибадәт әркинликини боғуш билән әйибләнмәктә. Америка ташқий ишлар министирлиқиниң 2005 - йилдики доклатида, хитай һөкүмити уйғур мусулманлириниң диний ибадәт әркинликини вә яшларниң намаз оқуш, роза тутуш, мәсчиткә кириш һәмдә мусулманларниң һәҗ тавапиға беришини чәклимәктә, дәп тәнқидләнгән. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.