Xitayda imam - xatiplargha layaqetlik kinishkisi élish ölchimi qoyuldi
2006.05.12
Béyjing hökümiti meschitke imam - xatip bolghuchilarning buningdin kéyin hökümet belgilep bergen shertler boyiche layaqetlik kinishkisi almay turup imam - xatip bolushini chekleydighan yéngi belgilime chiqardi. Belgilime boyiche musulmanlar imam - xatip bolmaqchi bolsa choqum éghizche we yazmiche imtihan'gha qatshishi we layaqetlik kinishkisi élishi kérek.
Belgilimide körsitilishiche, yéshi 60 tin ashqan we uzundin béri imam - xatipliq qilip kéliwatqan diniy zatlar bu belgilimining ichige kirmeydiken. Lékin belgilimide imam - xatiplarning " qanunlargha boy sunidighan, islam diniy inistitutini püttürgen yaki muntizim medris terbiyisi we teng derijilik sawat alghan, qur'ani - kerimni qa'ide teleppozi boyiche yadliyalaydighan kishiler" bolushi telep qilindi.
Junggo islam jem'iyitining peyshenbe küni béyjingda axirlashqan memliketlik wekiller qurultiyi " islam diniy xadimlirining layaqitini belgilesh usuli" , " islam diniy pa'aliyet sorunlirining diniy xizmetchilirini wezipige teyinlesh usuli" we " meschit bashqurush usuli" qatarliq bir qatar qa'ide - tüzümlerni maqullighan. Bu belgilimilerde meschitlerning ilkidiki yer - zémin, öy mülkini shu jaydiki zémin bashqurush idarisigha tizimgha aldurush we guwaname élish telep qilindi.
Xitay diniy sorunlarni kontrol qilish, dindarlarning diniy pa'aliyitige cheklime qoyush, ibadet erkinlikini boghush bilen eyiblenmekte. Amérika tashqiy ishlar ministirliqining 2005 - yildiki doklatida, xitay hökümiti Uyghur musulmanlirining diniy ibadet erkinlikini we yashlarning namaz oqush, roza tutush, meschitke kirish hemde musulmanlarning hej tawapigha bérishini cheklimekte, dep tenqidlen'gen. (Erkin)
Munasiwetlik maqalilar
- Aptonum rayonluq hökümet, yash - ösmürlerge bolghan étiqad terbiyisini kücheytti
- Ismayil tiliwaldi: chégra halqighan diniy küchlerning singip kirishige qet'iy qarshi turimiz
- Wang léchüen atizm terbiyisini kücheytishni tekitlidi
- Uyghur aptonom rayonida yer asti xiristyan chérkawlirigha qarshi tazilash élip bérilghan
- Erkin alptékin dunya islam kéngishi teshkilatigha Uyghurlarning diniy erkinliki heqqide muraji'etname yollidi