Shayarda bir yash muderris balilargha qur'an ügetkenliki üchün qolgha élindi

Uyghur aptonom rayonining shayar nahiyiside bu yil 35 yashlardiki bir muderris yazliq tetildin paydilinip balilargha qur'an ügetkenliki üchün xitay da'iriliri teripidin qolgha élin'ghan.

Dunya Uyghur qurultiyining seyshenbe küni ashkarilishiche, shayar nahiyisining qoylar yézisida olturudighan tuniyaz zordun isimlik bir yash muderris, yazliq tetildin paydilinip mehellisidiki 10 dek balini yighip öyide qur'an kursi achqan. Lékin buningdin xewer tapqan saqchilar tuniyaz zordunning öyige bésim kirip, yash muderrisni we qur'an sawadi chiqiriwatqan balilarni tutup ketken.

Dunya Uyghur qurultiyi bayanatchisi dilshat rishit, balilarning ata - anisigha 1000 yüendin 2000 yüen'giche jerimane qoyulghandin kéyin balilar qoyup bérilgenlikini, lékin tuniyaz zordunning qolgha élin'ghanliqini bildürgen bolsimu, lékin bu weqening qachan yüz bergenlikini tilgha almidi.

Dilshat rishitning eskertishiche, da'iriler tuniyaz zerdun üstidin yéqinda sot achmaqchi iken. Dilshat rishitning eskertishiche, "tuniyaz zordunning a'ilisidiki tuniyazgha uzun - muddetlik qamaq jazasi bérilse, a'ilisining weyran bolup kétishidin ensirimekte," iken. U," sherqiy türkistanda diniy erkinlikni öz ichige alghan eng asasi kishilik hoquqni depsende qilish xitay da'irilirigha nisbeten numus qilmaydighan adettiki bir nersige aylinip qaldi," deydu.

Jonggo da'iriliri Uyghur'aptonom rayonida hökümet kontrol qilmighan her qandaq diniy intilishni "qanunsiz diniy pa'aliyetler," dep eyiplimekte. (Erkin)