Xitay hökümiti diniy zatlarni öz xa'ishi boyiche terbiyelewatqanliqini bildürmekte

Xitay hökümitining Uyghur éligha békitken emeldari wang léchüen 13 ‏- dékabir küni, Uyghur ilidiki diniy zatlarning partkom, xelq hökümitining toluq mü'eyyenleshtürüshi we étirap qilishgha érishkenlikini bildürdi.

Xitay metbu'atlirida ashkarilinishiche, aptonom rayon hökümiti, bir yil ichide 10 nechche qararliq wetenperwer diniy zatlarni terbiyilesh kursi uyushturup, hazirgha qeder 6 ming 800 din köprek diniy zatni, wetenperwer diniy zat qilip terbiyiligen.

Wang léchüen sözide " wetenperwer diniy zatlar dinni sotsiyalizimgha maslashturush jehettiki rolini pa'al jari qildurup, din'gha étiqad qilidighan ammini yéteklep, inaq bolghan shinjang qurush üchün töhpe qoshushi kérek" dégen.

Xelq'ara kishilik hoquq teshkilatliri, xitay hökümitini izchil türde puqralarning diniy erkinlikige tosqunliq qilmaqta dep eyiblep kelmekte. Chet'ellerde pa'aliyet élip bériwatqan Uyghur teshkilatlirimu, xitayning" dinniy sotsiyalizimgha maslashturush, diniy zatlarni hökümet üchün, shinjangning muqimliqi üchün xizmet qildurush" digen shu'arlirini qattiq eyiblep, buning del dinni kommunistik partiye tüzümige tedbiqlash, bolupmu diniy qa'ide yosunlarni buzup, dinni partiye üchün xizmet qilidighan qoralgha aylanduruwalghanliqini bildürmekte. (Eqide)