Үрүмчидә миллий диний затлар муһакимә йиғини өткүзүлди


2006.07.30

27‏- Июл күни үрүмчидә миллий диний затлар муһакимә йиғини өткүзүлүп, йиғинға қатнашқучилар, қандақ қилип диний затларниң ролини яхши җари қилдуруш вә һөкүмәт орунлириға ярдәмлишип миллий диний затлар хизмитини яхши елип бериш мәсилилиридә музакириләшти.

Шинҗаң хәвәр ториниң мәлум қилишичә, йиғинда һәр милләтлик диний зат вәкиллири сөз қилип, буниңдин кейин уларниң өзлигидин шәһәрлик һөкүмәткә ярдәмлишип, җәмийәтниң сиясий муқимлиқини вә диний саһәниң муқимлиқини қоғдашқа тиришидиғанлиқини, шундақла милләтләр иттипақлиқи, динлар арисидики инақлиқ вә сиясий тинчлиқни қолға кәлтүрүштә актип рол ойнайдиғанлиқини билдүргән.

Йиғинға қатнашқан үрүмчи шәһәр башлиқи нейим ясин һәр милләт диний затлириға тәшәккүр ейтиш билән биргә, милләтләр диний хизмитиниң партийә вә дөләтниң узун мәзгиллик тинч-муқимлиқини капаләткә игә қилидиған муһим амил икәнликини билдүрди. У йәнә, мунасивәтлик орунларниң диний ишларни башқуруш қанун-түзүлмиси бойичә иш тутуп, бу җәһәттики башқурушни күчәйтиш керәкликини тәкитлигән.

Бу йиғинға миллий диний ишлар идарисидин сирт йәнә, җамаәт хәвпсизлик идариси вә сәһийә идарилиридики мунасивәтлик мәсул хадимлар қатнашқан. Уйғур көзәткүчиләр, хитай һөкүмитиниң уйғурларға һәқиқий диний әркинлик бәрмәйватқанлиқини һәмдә һәр йили дегүдәк уйғур елидики диний затларға түлүк сиясий өгинишләрни елип берип, уларни хитай коммунист партийиси үчүн хизмәт қилишқа үндәватқанлиқини илгири сүрмәктә. (Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.