Хитай һөкүмити қизилсу областида бу йил йәнә 420 диний затни "вәтәнпәрвәр " қилип тәрбийилимәкчи

Қизилсу аптонум областиниң һөкүмәт тор бетидә -6 април берилгән хәвәрдин ашкарилинишичә, атушта 2007 - йиллиқ вәтәнпәрвәр диний затларни тәрбийиләш курсиниң иккинчи нөвәтлики рәсмий дәрс башлиған болуп, қизилсуниң бир шәһәр һәм үч наһийидин кәлгән 70 нәпәр ислам диний өлималири хитайниң диний сиясәтлири һәмдә вәтәнпәрвәрлик тәлимлирини алмақта икән.

Қизилсу областлиқ партком, миллий ишлар комитети, сиясий мәктәп қатарлиқ орунлар бу йил мушундақ курстин төт қетим ечишни пиланлиған болуп, қизилсу тәвәсидә җәмий 420 нәпәр ислам диний затлирини вәтәнпәрвәр диний зат қилип тәрбийиләшни ишқа ашуридикән.

Йеқиндин буян уйғур елиниң башқа җайлиридиму мушуниңға охшаш курслар йәниму көп ечилишқа башлиған. Шундақла бу курсларға қатнишиватқан диний өлималарға хитай һөкүмитиниң, үч хил күчләргә қарши тәшвиқатидин башқа аз санлиқ милләтләргә қарита пиланлиқ туғут сияситини мәсчит вә диний сорунларда тәшвиқ қилиш вәзипилири йүкләнгән.

Йеқинда уйғур аптонум районлуқ пиланлиқ туғут комитетиниң партком секретари, уйғур елидә, ислам диниға етиқад қилидиған аз санлиқ милләтләргә пиланлиқ туғут сияситини йүргүзүштә вәтәнпәрвәр диний затлардин үнүмлүк пайдилиниш керәк дәп оттурға қойған иди. (Гүлчеһрә)