خىتاينىڭ ئۇيغۇر دېھقانلارنى خىتاي ئۆلكىلىرىگە يۆتكەش سىياسىتى ئىزچىل داۋاملاشماقتا


2007.06.28
Share on WhatsApp
Share on WhatsApp

خىتاي ھۆكۈمىتى ئۇيغۇر دېھقانلىرىنى خىتاي ئۆلكىلىرىگە يۆتكەش قەدىمىنى تېخىمۇ تېزلىتىش ئۈچۈن، شەھەر، ناھىيە ۋە يېزىلار بۇيىچە مەخسۇس تەربىيىلەش بازىلىرىنى قۇرۇپ، دېھقانلارغا سىياسەت، قانۇن ۋە خىتاي تىلى ئۆگىتىش خىزمىتىنى كۈچەيتمەكتە.

خىتاي ئاخبارات ۋاستىلىرىنىڭ يېقىندا ئېلان قىلغان خەۋىرىدە كۆرسىتىلىشىچە ، ئاقسۇ شەھىرىدىكى دېھقانلار بۇ يىل 5 ‏- ئايدىن باشلاپ تەربىيىلىنىش بازىلىرىدا ھۆكۈمەتنىڭ قانۇن سىياسىتىنى شۇنىڭدەك خىتاي تىلىنى ئۆگىنىش كۇرسلىرىغا قاتناشتۇرۇلغان بولۇپ، مەزكۈر كۇرس يىل ئاخىرىغىچە 11 مىڭ 800 دېھقاننى تەربىيىلەش بىلەن بىرگە، 8 مىڭ 300 دېھقاننى خىتايغا ئۆلكىسىگە يۆتكەش ھازىرلىقىنى ئېلىپ بارىدىكەن.

خەۋەردە ئېيتىلىشىچە، بۇنداق قىلىشتىكى ئاساسىي مەقسەت دېھقانلارنى نامراتلىقتىن قۇتۇلدۇرۇش ۋە ئۇلارنىڭ خىتاي ئۆلكىلىرىدە ئىش تېپىپ ئىشلىشىگە ئالدىن شارائىت ھازىرلاش ئىكەن.

خىتاي دائىرىلىرىنىڭ نامرات دېھقانلارنى يۆلەش سىياسىتى باھانىسىدا دېھقانلارنى خىتاي ئۆلكىلىرىگە يۆتكەپ ئىشلىتىشى، ئۇيغۇرلارنىڭ كىشىلىك ھوقۇقى ئۈچۈن پائالىيەت ئېلىپ بېرىۋاتقان چەتئەللەردىكى ئۇيغۇر تەشكىلاتلىرىنى قاتتىق ئەندىشىگە سالماقتا.

ئۇيغۇر تەشكىلاتلىرى پائالىيەتچىلىرى، بولۇپمۇ ئۇيغۇر قىزلىرىنىڭ ئېشىنچى ئەمگەك كۈچى سۈپىتىدە ئىچكىرى ئۆلكىلەرگە ئېلىپ كېتىلىشى، خىتاي ھۆكۈمىتىنىڭ ئۇيغۇرلارنى ئاسسىمىلياتسىيە قىلىش قەدىمىنى تېزلىتىش ئىستىراتېگىيىسى ئىكەنلىكىنى ئەسكەرتىپ ، خەلقئارا جامائەتتىن خىتاي ھۆكۈمىتىگە بۇ خىل ھەرىكىتىنى توختىتىش ئۈچۈن بىسىم ئىشلىتىشىنى تەشەببۇس قىلماقتا. (ئەقىدە)

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت