Хитайниң уйғур деһқанларни хитай өлкилиригә йөткәш сиясити изчил давамлашмақта


2007.06.28

Хитай һөкүмити уйғур деһқанлирини хитай өлкилиригә йөткәш қәдимини техиму тезлитиш үчүн, шәһәр, наһийә вә йезилар буйичә мәхсус тәрбийиләш базилирини қуруп, деһқанларға сиясәт, қанун вә хитай тили өгитиш хизмитини күчәйтмәктә.

Хитай ахбарат вастилириниң йеқинда елан қилған хәвиридә көрситилишичә , ақсу шәһиридики деһқанлар бу йил 5 ‏- айдин башлап тәрбийилиниш базилирида һөкүмәтниң қанун сияситини шуниңдәк хитай тилини өгиниш курслириға қатнаштурулған болуп, мәзкүр курс йил ахириғичә 11 миң 800 деһқанни тәрбийиләш билән биргә, 8 миң 300 деһқанни хитайға өлкисигә йөткәш һазирлиқини елип баридикән.

Хәвәрдә ейтилишичә, бундақ қилиштики асасий мәқсәт деһқанларни намратлиқтин қутулдуруш вә уларниң хитай өлкилиридә иш тепип ишлишигә алдин шараит һазирлаш икән.

Хитай даирилириниң намрат деһқанларни йөләш сиясити баһанисида деһқанларни хитай өлкилиригә йөткәп ишлитиши, уйғурларниң кишилик һоқуқи үчүн паалийәт елип бериватқан чәтәлләрдики уйғур тәшкилатлирини қаттиқ әндишигә салмақта.

Уйғур тәшкилатлири паалийәтчилири, болупму уйғур қизлириниң ешинчи әмгәк күчи сүпитидә ичкири өлкиләргә елип кетилиши, хитай һөкүмитиниң уйғурларни ассимилятсийә қилиш қәдимини тезлитиш истиратегийиси икәнликини әскәртип , хәлқара җамаәттин хитай һөкүмитигә бу хил һәрикитини тохтитиш үчүн бисим ишлитишини тәшәббус қилмақта. (Әқидә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.