Америка хәлқара диний әркинлик кометити рабийә қадир ханимниң пәрзәнтлири һәққидә баянат елан қилди


2006.12.14

Америка хәлқара диний әркинлик комитети 13‏- дикабир күни бир баянат елан қилип, хитай һөкүмитиниң мәшһур кишилик һоқуқ паалийәтчиси, дуня уйғур қурултийиниң рәиси рабийә қадир ханимниң үч оғлини тотуш вә сотлаш җәрянида уларға қарита тән җазаси шуниңдәк қорқутуш вә тәһдит қатарлиқ васитилардин пайдиланғанлиқи тоғрсида чиққан хәвәрләрдин қаттиқ қайғурғанлиқини билдүрди.

Америка диний әркинлик комитетиниң рәиси фелис гер тәрипидин елан қилинған мәзкүр баянатда, " хитай даирилириниң кишилик һоқуқ қоғдуғучилирини уҗуқтуруш һәрикити бейҗиң һөкүмитиниң қанун һакимийити текләш тоғрисидики вәдилириниң қуруқ сөздин ибарәт икәнликини көрситиду" дейилгән.

Баянатда йәнә, хитай һөкүмитиниң рабийә ханимниң оғуллири алим абдуриһим вә қаһар абдуриһимни "баҗ оғурлиған" дәп әйибләп, алим абдуриһимға 7 йиллиқ қамақ җазаси, қаһарға җәримәнә төләш җазаси һөкүм қилғанлиқи әскәртилгән. Баянатда, " рабийә ханимниң пәрзәнтлири америка дөләт мәҗлиси кишилик һоқуқ өмикиниң уйғур елини зиярити һарписида қолға елинғанлиқ үчүн, күзәткүчиләр уларниң сиясий сәвәбләрдин қолға елинғанлиқини һәмдә сиясий сәвәбләрдин әйибләнгәнликини қияс қилмақта " дейилгән.

Америка диний әркинлик комитетиниң баянатида, рабийә ханимниң бөлгүнчилик билән әйибләнгән йәнә бир оғли абликим абдурһимниң һазир қандақ вәзийәттә туруватқанлиқиниң мәлум әмәслики алаһидә әскәртилгән. (Әқидә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.