Amérika xelq'ara diniy erkinlik kométiti rabiye qadir xanimning perzentliri heqqide bayanat élan qildi

Amérika xelq'ara diniy erkinlik komitéti 13‏- dikabir küni bir bayanat élan qilip, xitay hökümitining meshhur kishilik hoquq pa'aliyetchisi, dunya Uyghur qurultiyining re'isi rabiye qadir xanimning üch oghlini totush we sotlash jeryanida ulargha qarita ten jazasi shuningdek qorqutush we tehdit qatarliq wasitilardin paydilan'ghanliqi toghrsida chiqqan xewerlerdin qattiq qayghurghanliqini bildürdi.

Amérika diniy erkinlik komitétining re'isi félis gér teripidin élan qilin'ghan mezkür bayanatda, " xitay da'irilirining kishilik hoquq qoghdughuchilirini ujuqturush herikiti béyjing hökümitining qanun hakimiyiti téklesh toghrisidiki wedilirining quruq sözdin ibaret ikenlikini körsitidu" déyilgen.

Bayanatda yene, xitay hökümitining rabiye xanimning oghulliri alim abdurihim we qahar abdurihimni "baj oghurlighan" dep eyiblep, alim abdurihimgha 7 yilliq qamaq jazasi, qahargha jerimene tölesh jazasi höküm qilghanliqi eskertilgen. Bayanatda, " rabiye xanimning perzentliri amérika dölet mejlisi kishilik hoquq ömikining Uyghur élini ziyariti harpisida qolgha élin'ghanliq üchün, küzetküchiler ularning siyasiy seweblerdin qolgha élin'ghanliqini hemde siyasiy seweblerdin eyiblen'genlikini qiyas qilmaqta " déyilgen.

Amérika diniy erkinlik komitétining bayanatida, rabiye xanimning bölgünchilik bilen eyiblen'gen yene bir oghli ablikim abdurhimning hazir qandaq weziyette turuwatqanliqining melum emesliki alahide eskertilgen. (Eqide)