Мәкит хәлқ артистлири долан хәлқ нахшилирини әнглийидә орунлимақчи

Қәшқәр вилайитиниң мәкит наһийисидики 5 нәпәр хәлқ артисти йеқинда әнглийидә өткүзилидиған хәлқаралиқ хәлқ нахша-музикилири фестивалиға қатнишип, долан хәлқ нахшилирини орунлайдикән.

Тәңритағ хәвәр ториниң мәлум қилишчә, бу артистлар йеши 58 яштин 76 яшқичә болған хәлқ артистлири болуп, улар бу долан нахшилирини инсанларниң ғәйри маддий мәдәнийәт мираслири сүпитидә әнглийидики бу фестивалда орунлайдикән. Лекин хәвәрдә ениқ күн тәртипи берилмигән.

Мәкитлик бу 5 нәпәр долан нахшичилири уйғур елида амминиң қизғин алқишиға еришипла қалмай, илгириму франсийә вә корийә қатарлиқ дөләтләрдә долан музикилирини орунлап тамашибинларниң алқишиға еришкән вә дөләт ичидә көп қетим мукапатларни алған.

Буниңдин сирт йәнә, ақсу вилайитиниң ават наһийисидики хәлқ артистлиридин тәшкилләнгән долан ансамбили бу йил 11‏-айда дунядики даңлиқ музика сарийи болған венаниң алтун тиятирханисида долан муқамини көрсәтмәкчи. Уйғурларниң "‏12 муқам" и 2005‏- йили бирләшкән дөләтләр тәшкилати тәрипидин "инсанларниң ағзаки вә ғәйри маддий мәдәний мираслири" тизимликигә киргүзүлгән болуп, шуниңдин буян уйғур муқами хәлқара сәнәт сәһнисидә көзгә көрүнүшкә башлиди. (Пәридә)