Xitayning dolan el ichi sen'etkarlirigha bergen turmush kapaliti chet'eldiki Uyghurlarning naraziliqini qozghidi


2006.11.30

Yéqinda xitayning aptonom rayonluq hökümiti, Uyghur dolan sen'etkarliridin 12 nepirige ghemxorluq qilip, ularning turmushigha kapaletlik qilghanliqini bildürgen bolup, xitay metbu'atliridin ashkarilinishiche meshhur dolan muqamchisi höseyin yehyagha 11 ‏- aydin étibaren 110 yüen mu'ash bergen.

Igilishimizche, dolan muqamchisi höseyin yehya, en'giliye, yaponiye, fransiye qatarliq döletlerge bérip oyun qoyup, chet'elliklerni heyran qaldurghan, biraq ularni chet'ellerde oyun qoyushqa uyushturghan xitay hökümiti, dolan sen'itini jungxu'a medenyitining bir qismi dep tonushturup, uning sheripige ige bolghan bolsimu, emdilikte az sandiki 12 muqamchini 15 dollargha yetmeydighan mu'ash bilen teminlep, ularning turmushigha kapaletlik qilghanliqini teshwiq qilghan.

Xitay xelqi arisidiki changchil sen'etkarlirigha alahide ghemxorluq qilip, ularni yuqiri turmush sewiyisige ige qilghan xitay hökümitining dolan el ichi sen'etkarlirini eng töwen turmush kapaliti bilen teminlishi, chet'ellerdiki Uyghurlarning küchlük naraziliqini meydan'gha keltürmekte, ularning bildürüshiche, Uyghur medenyitidiki meshhur sen'et türliridin biri bolghan dolan sen'itini, ewlatlargha miras qaldurush we téximu tereqqi qildurush intayin muhim bir xizmet bolup, xitay hökümitining dolan muqamining pishwasi höseyin yehyagha aran 110 yüen mu'ash bérishi, uning turmushini kapaletke ige qilalmayla qalmastin , Uyghurlarning en'eniwiy miraslirini qoghdashqimu köngül bölmeywatqanliqini körsitidiken .

Közetküchiler yene , xitay hökümiti, héchqachan xitay bolmighan milletlerning medenyitini qoghdashqa ehmiyet bergen emes déyishmekte. (Eqide)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.