Америка консулханиси долқун әйсани иптар зияпитигә тәклип қилди


2007-09-28
Share

Алдинқи күни германийиниң мюнхен шәһиридики америка консулханиси, дуня уйғур қурултийи баш катипи долқун әйсани америка баш консули әрик нелсонниң өйидә өткүзүлгән иптар зияпитигә тәклип қилди вә долқун әйса зияпәткә қатнашти.

Дуня уйғур қурултийи тор бетиниң бу һәқтики хәвиридә әскәртилишичә, әрик нелсонниң өйидики иптар зияпитигә мюнхендики мусулман тәшкилатларниң рәһбәрлири, диний затлар вә бәзи мусулман дөләтләр консуллири қатнишипла қалмай, зияпәттә йәнә америкиниң германийидики баш әлчиси вилям тимкен, ханими сю тимкен, мюнхен шәһириниң башлиқи кристйен уде, баварийә штатиниң әдлийә министири бйете мерк, түркийиниң мюнхен баш консули рифат көксални өз ичигә алған 50 дәк дипломат вә бир қисим һөкүмәт әмәлдарлири һазир болған.

Дуня уйғур қурултийиниң хәвиридә әскәртишичә, долқун әйса зияпәт җәрянида америка баш әлчиси вилян тимкен, мюнхен шәһәр башлиқи кристйен уде вә америка баш консули әрик нелсонлар билән сөһбәтлишип, уларға рамизан ейи җәрянида уйғур елидә йүз бериватқан һадисиләр, уйғурларға қаритилған диний бесим, болупму рамизан ейи җәрянида роза тутуш әркинликиниң чәклимигә учраватқанлиқини йәткүзгән.

Анализчилар, иптар зияпити бир тәрәптин америка һөкүмитиниң һәр хил динларға, җүмлидин ислам диний вә мусулманларға һөрмәт қилидиғанлиқини ипадиләш болса, йәнә бир тәрәптин долқун әйсани иптарға чақириш хитай даирилириниң долқун әйсани аталмиш "шәрқий түркистан террорчилар тизимлики"дики шәхс, дәп елан қилғанлиқини етибарға алмиғанлиқиниң намайәндиси, дәп мулаһизә қилишмақта. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт