D u q gérmaniye da'irilirini Uyghurlarning térrorluq hujum pilanlawatqanliqi heqqidiki xewerge diqqet qilishqa chaqirdi

Merkizi gérmaniyidiki dunya Uyghur qurultiyi bayanat élan qilip, gérmaniye da'iriliridin mezkur dölettiki Uyghurlarning xitayda térrorluq herikiti élip bérishni pilanlawatghanliqi heqqidiki xewerge diqqet qilishni telep qildi.

Dunya Uyghur qurultiyi aldinqi küni élan qilghan bayanatida mundaq deydu: "bu béyjingning 2003 - yili 12 - ayda élan qilghan 'birinchi türkümdiki sherqiy türkistan térrorluq teshkilatlar we térrorchilar tizimliki' ni aqturalmighandin kéyin, shundaqla 2004 - yili 4 - ayda dunya Uyghur qurultiyining qurulushini tosalmighandin kéyin, gérmaniyide qanunluq pa'aliyet élip bériwatqan Uyghur teshkilatlargha qarshi oynighan 'térrorchiliq' heqqidiki yéngi oyuni."

Gérmaniyide chiqidighan "dér spéygél " gézitining xewer qilishiche, xitay hökümiti yéqinda gérmaniye amanliq da'irilirige gérmaniyidiki Uyghur teshkilatlirining xitayda térrorluq hujum pilanlawatqanliqi heqqidiki pakitlargha érishkenlikini uqturghan.

Gérmaniye da'iriliri xitay terepning telipi boyiche béyjinggha ikki neper tekshürgüchi ewetidighanliqini élan qilghan. "Dér spéygél" gézitining ashkarilishiche, xitay hökümiti gérmaniye da'iriliridin gérmaniyidiki Uyghur teshkilatlirini shundaqla teshkilat rehberlirini chekleshni telep qilghan, biraq gérmaniye da'irilirining ret qilishigha uchrighan.

Dunya Uyghur qurultiyi, xitaylarning 11 - séntebir tragédiyisini purset bilip, sherqiy türkistandiki Uyghurlarni jazalawatqanliqini, shundaqla ularning xitay mustemlikichilik hökümranliqigha qarshi yolluq herikitini " térrorchiliq" dep qarilawatqanliqini ilgiri sürgen.(Erkin)