Дуня уйғур қурултийи " хәлқ вәкиллири" ни қаттиқ әйиплиди


2005-01-16
Share

Дуня уйғур қурултийи йәкшәнбә күни баянат елан қилип, уйғур аптонум районлуқ хәлқ қурултийи вә сиясий кеңәшниң йиғинлириға қатнишиватқан, аталмиш "хәлқ вәкиллири" ниң хәлқниң һәқиқий тәләплирини аңлатмайватқанлиқини қаттиқ әйиплиди.

Уйғур аптонум районлуқ 10 - нөвәтлик хәлқ қурултийиниң 3 - омумий йиғини вә 9 - нөвәтлик сиясий кеңәшниң 3 - омумий йиғини бир һәптидин буян үрүмчи шәһиридә ечиливатқан иди.

Дуня уйғур қурултийиниң баянатчиси дилшат ришитниң билдүришичә, аталмиш хәлқ вәкиллири шәрқий түркистандики хәлқләрниң мәнпәәтигә уйғун иҗабий тәшәббусларни әмәс, бәлки хитай һөкүмитиниң уйғурларға қаратқан диний, сиясий вә маарип җәһәттики сиясәтлирини күчләндүридиған пикирләрни оттуриға қойған.

Мәсилән, ғулҗа хәлқиниң вәкили сүпитидә йиғинға қатнашқан ғулҗа шәһәрлик маарип идарисиниң муавин башлиқи аблиз аблимит, уйғур миллий маарипини қандақ тәрәққий қилдурушниң орниға, 2007 - йили ғулҗа шәһири тәвәсидики барлиқ миллий башланғуч - оттура мәктәпләрдә пүтүнләй хитайчә оқутушни әмәлгә ашурушни оттуриға қойған. Хәлқ вәкили өмәрҗан мирзәхмәт, деһқанларниң әмәлий дүч кәлгән мәсилилирини инкас қилмастин, бәлки компартийиниң нөвәттә йезиларда йүргүзүватқан сияситини махтиған.

Дуня уйғур қурултийи баянатиниң ахирида, хитай һөкүмитини сөз әркинликигә йол қоюп, уйғур хәлқиниң һәқиқий тәләплиригә қулақ селишқа чақирди. (Арзу)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт