Д у қ рәиси әркин алиптекин әпәндиниң канададики зиярити давамлашмақта


2005-05-16
Share

Дуня уйғур қурултийиниң рәиси әркин алиптекин әпәнди йәкшәнбә күни канада уйғур җәмийити вә торонто университети бирликтә өткүзгән " хитай һөкүмранлиқи астидики уйғурларниң бүгүнки әһвали" темисидики муһакимә йиғиниға қатнашти.

Әркин алиптекин әпәнди йиғинда сөз қилип, уйғурларниң яшаш шараитиниң барғансири начарлишиватқанлиқини, хитай һөкүмитиниң "террорчилиққа қарши туруш" намида, уйғурларға қаратқан қаттиқ қол бастуруш сияситиниң өткәнки һәр қандақ вақитниңкидин ешип чүшкәнликини билдүрди. У йәнә уйғурларниң вәзийитиниң нөвәттә барғансири хәлқара җәмийәтниң диққитини қозғаватқанлиқини көрсәтти.

Муһакимә йиғиниға, дуняниң һәр қайси җайлиридин кәлгән уйғурлар, ғәрб мутәхәссислири, кишилик һоқуқ тәшкилатлириниң вәкиллири вә дипломатлардин болуп 150 кә йеқин адәм қатнашқан.

Йиғинға қатнашқучилар, уйғур елидики уйғурларниң кишилик һоқуқ вәзийитиниң интайин начарлиқини билдүрүп, канада һөкүмитини бу һәқтә хитайға бесим ишлитишкә чақирди.

Бу қетимқи йиғин дуня уйғур қурултийиниң рәиси әркин алиптекин әпәндиниң торонто зияритиниң муһим бир тәркиби қисми . Буниң алдида, у канаданиң сабиқ ташқи ишлар министири, канада парламенти кишилик һоқуқ комитетиниң рәиси дәйвид килгор әпәнди билән канада парламентида мәхсус сөһбәт өткүзгән.

Дуня уйғур қурултийиниң билдүрүшичә, килгор әпәнди әркин алиптекин әпәндиниң уйғурларниң нөвәттики вәзийити һәққидә бәргән мәлуматини аңлиғандин кийин, уйғурлар дәвасиниң канадада йилтиз тартишиға ишинидиғанлиқини вә өзиниң уйғурларниң вәзийитигә бундин кийин техиму көңүл бөлидиғанлиқини билдүргән.

Әркин алиптекин әпәнди өткән пәйшәнбә күни канадаға кәлгән болуп, у сәйшәнбә күни канададики зияритини ахирлаштуруп, америкиниң вашингтон шәһиригә келиду һәмдә даңлиқ уйғур кишилик һоқуқ паалийәтчиси рабийә қадир ханим билән учришип, уйғур мәсилиси һәққидә музакирә елип бариду. (Арзу)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт