Д у қ 11 ‏- сентәбир вәқәси мунасивити билән баянат елан қилди


2007-09-11
Share

Америкида йүз бәргән террорлуқ һуҗуминиң 6 йиллиқ мунасивити билән бүгүн дуня уйғур қурултийи баянат елан қилди.

Бу мунасивәт билән зияритимизни қобул қилған дуня уйғур қурултейиниң баянатчиси дилшат решит, алди билән дуня уйғур қурултийиниң һәрқайси дөләттики әзалириниң америка хәлқи билән бирликтә, террорлуқ һуҗумида қурбан болғанларға тәзийә билдүридиғанлиқини тәкитлиди.

Дилшат решит сөзидә, уйғур хәлқиниң демократик дөләт әллириниң хәлқи билән бирликтә, террорчилиқ һәркәтлиригә қарши туридиғанлиқини болупму хитай коммунистлириниң уйғурларға қарита йүргүзиватқан дөләт террорчилиқини қаттиқ әйибләйдиғанлиқини билдүрди.

Хитай һөкүмитиниң америка вә ғәрб әллириниң террорчилиққа қарши күришидин пайдилинип, уйғур мәдәнийити, диний вә сөз әркинликини изчил бастуруп келиватқанлиқини оттуриға қойған дилшат решит": бүгүн, уйғурлар дуняда аз учрайдиған дөләт террорчилиқиниң қурбаниға айланди, хитай уйғур миллитини йоқ қилиш үчүн, алди билән униң тилини йоқ қилиш истратегийисини ишлитип, уйғур маарипиниң орниға хитай маарипини дәссәтти, уйғурларни хитайлардин пәрқләндүрүп туридиған диний ‏ өрп адәтлиридин мәһрум қалдуруш үчүн, диний әркинликтин чәклиди, уйғурларни сиясий һоқуққа игә болалмайдиған әсир милләт қилиш үчүн, һөкүмәткә наразилиқ билдүргән өктичиләрни бастурди, түрмиләргә ташлиди һәтта дуняда аз учрайдиған өлүм җазаси билән җазалиди ," деди.

Дилшат решит , хитайниң террорчилиққа зәрбә бериш күришидин пайдилинип, уйғурларниң демократийә вә кишилик һоқуқ үчүн елип бериватқан һәққаний күрәшлирини, дуня җамаәтчиликигә " террорлуқ "һәрикәт қилип көрситиштәк рәзил нийитиниң ишқа ашмайдиғанлиқини йәнә бир қетим тәкитлиди. (Әқидә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт