Erkin alptékin dunya islam kéngishi teshkilatigha Uyghurlarning diniy erkinliki heqqide muraji'etname yollidi

Dunya Uyghur qurultiyining re'isi erkin alptékin peyshenbe küni dunya islam elliri yighini teshkilatigha muraji'etname élan qilip, peyghember eleyhissallamning hejiwi resimige shiddetlik inkas qayturghan, emma Uyghurlarning meschitke kirish, roza tutush we hej ibaditi cheklense inkas qayturmighan dunya islam teshkilati döletlirini Uyghurlarning diniy weziyitige köngül bölüshke chaqirdi.

U, dunya islam teshkilatigha yazghan muraji'etnamiside, " Uyghurlarning diniy étiqadi ularni kontrol qilishning qoraligha aylinip qalmaqta. Yéqindin béri xitay da'iriliri Uyghurlargha qaritilghan tizginleshni kücheytip, dölet we hökümet ishchi - xizmetchiliri, yash- ösmürler, partiye ezaliri we ayallarning meschitke kirishini cheklidi" dep yazghan. Erkin alptékin muraji'etnamiside, xitay hökümiti Uyghurlarning diniy hoquqini depsende qilish bilen birge, diniy zatlarni qolgha élish, zindan'gha tashlash, ten jazasi bérish, öltürüsh we réjim astida tutush siyasiti ijra qilip kéliwatqanliqini misallar bilen tekitlidi.

U, " xitay da'irilirining mewjut siyasiti sherqiy türkistan xelqini ümidsizlik we buruxtumluqqa mehküm qilmaqta. Bu ümidsizlik Uyghur musulmanlirini zor tewekkülchilikke mejburlishi mümkin " deydu. Erkin alptékinning dunya islam teshkilatigha yazghan muraji'etnamisi peyghember eleyhissallamning hejwi resimi daniye gézitide élan qilin'ghandin kéyin, islam dunyasida zor naraziliq peyda qilghan weziyetke toghra keldi. Emma xitay da'irilirining musulmanlargha buyrulghan diniy perizlerni cheklesh siyasiti islam dunyasida hezriti muhemmedning hejiwi resimichilik inkas qozghiyalmighan.

Muraji'etnamisining axirida erkin alptékin, dunya islam elliri yighini teshkilati rehberlikining sherqiy türkistanda tekshürüsh élip bérish, diniy we siyasi öktichilerge ölüm jazasi bérishni toxtitish, Uyghurlarning medeniyet, diniy we milliy kimlikini qoghdashqa kapaletlik qilishni telep qildi. (Erkin)