D u q rabiye qadir bashchilighidiki amérika Uyghur birleshmisining yéngi hey'etlirini tebriklidi


2006.05.31
Share on WhatsApp
Share on WhatsApp

Bash shitabi gérmaniyidiki dunya Uyghur qurultiyi charshenbe küni bayanat élan qilip, amérika Uyghur birleshmisining re'islikige teyinlen'gen ataghliq kishilik hoquq pa'aliyetchisi rabiye qadir xanimni we bashqa hey'etlerni tebriklidi.

Dunya Uyghur qurultiyining re'isi erkin alptékin namida yézilghan bu bayanatta, " rabiye xanimning amérika Uyghur birleshmsi'ining re'islikige saylan'ghanliqi, milliy dawayimizning amérikida amérika Uyghur birleshmisini merkez qilghan halda téximu rawajlinish we teshkiliy qurulmining téximu küchlinish yolidiki tarixiy bir weqe" dep körsitilgen.

Bayanatta yene, amérika Uyghur birleshmisining nechche yilliq közge körünerlik netijiliri tebriklen'gen hemde rabiye xanimning xitay türmisidin chiqip washin'gton'gha qedem basqan künidin buyan , pütün jasariti bilen tinim tapmastin sherqiy türkistan mesililirini dunya jama'etchilikige, jümlidin amérika, yawrupa parlaméntliri we hökümetlirige anglitish yolida köp musapilarni basqanliqi sherhilen'gen.

Erkin alptékin dunya Uyghur qurultiyidiki barliq rehberlerge we qurultay terkibidiki barliq teshkilatlargha wakaliten élan qilghan bu bayanatida, "rabiye xanim bilen hazirghiche mürini-mürige tirep, bir mush bolup dawamlashturup kelgen birlik, hemkarliqning buningdin kéyinki xizmet jeryanida eynen dawamlishidighanliqigha we hetta téximu mukemmellishidighanliqigha ishinimen" dep jakarlighan.

Amérika Uyghur birleshmisining ikki yilda bir échilidighan qurultiyi 28‏-may yekshenbe küni washin'gtonda échilip, ataghliq kishilik hoquq pa'aliyetchisi rabiye qadir mezkur jem'iyetning re'islikike saylan'ghan idi. (Peride)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.