Dolqun eysa, yaponiye hökümitini xitaygha bésim ishlitishke chaqirdi

 Fransiye agéntliqining xewer qilishiche, dolqun eysa, yaponiyining paytexti tokyo shehiride bergen bayanatida, olimpik tenheriket yighinining tinchliq, erkinlik we dostluqning simwoli ikenlikini tekitlep, 'Uyghur we tibetlerge qaratqan siyasiti tüpeyli, béyjing hökümiti olimpik tenheriket yighinigha sahibxaniliq qilish salahiyitige ige emes' dep körsetken.

Yaponiyining sabiq bash ministiri shinzo abé we sabiq tashqi ishlar ministiri taro aso qatarliq yaponiye rehberliri we parlamént ezaliri bilen uchrashqan dolqun eysa, ulardin, Uyghurlargha qaratqan qattiq qol siyasitini özgertishi üchün, aldimizdiki hepte yaponiyini ziyaret qilidighan, xitay dölet re'isi xu jintaw gha bésim ishlitishini telep qilghan.

Béyjing olimpik tenheriket yighini harpisida, xitay hökümitining Uyghurlar qaratqan bésimini téximu kücheytkenlikini tekitligen, dunya Uyghur qurultiyining bash katibi, ötken töt besh ay ichide bixeterlik üchün tehdit dep qaralghan 10 ming din artuq Uyghurning, qolgha élin'ghanliqini we xitay da'irilirining, ulargha olimpik tenheriket yighini axirlashqan'gha qeder türmide tutup turuludighanliqini, bildürgenlikini, eskertti.