Хитайниң "әмгәк билән өзгәртиш" түзүми ислаһ қилинмақчи

2007-03-01
Елхәт
Пикир
Share
Принт

Франсийә агентлиқиниң пәйшәнбә күни бәргән хәвиридә көрситилишичә, хитай һөкүмити узундин бери тәнқидкә учрап келиватқан "әмгәк билән өзгәртиш" түзүмини ислаһ қилишни пилан қилған. Бу хәвәр хитай орган мәтбуатлиридин һесабланған "җоңгу гезити" ниң инглиз тилида чиқидиған нусхисида ашкариланған.

Хитай һөкүмитиниң мәзкур " әмгәк билән өзгәртиш" қануниға асасән, сақчи даирилири, сот тәрипидин һөкүм чиқирилмиған, шуниңдәк йиник дәриҗидә җинайәт садир қилған кишләрни, әмгәк билән өзгәртиш орнида әң узун болғанда 4 йилға қәдәр қамап қоялайдикән.

"Җоңгу гезити" дә йәнә ашкарилинишичә, хитай мәмликәтлик қурултийиниң бу йил 10 ‏- айда өткүзилидиған йиғинида, "әмгәк билән өзгәртиш " түзүминиң мунасивәтлик қанун лаһийисини қайтидин тәкшүрүп чиқиш қарар қилинған , әмма мәзкур қанун лайиһисиниң қанчилик дәриҗидә өзгәртилиши нөвәттә кишиләрдә гуман қозғаватқан муһим мәсилиләрдин бири икән.

Күзәткүчиләрниң билдүришичә, хитай пуқралириниң һөкүмәткә болған наразлиқиниң күнсайин ешишиға әгишип, хитай сақчилири нәзиридә җинайәтчи дәп қаралған кишиләр, мәсилән йәрлири мәҗбурий тартивилинған әрздарлар вә һөкүмәткә қарши пикир баян қилған өктичиләрниң , сотниң һөкүмисиз 4 йил қамап қоюлиши, хитайда һөкүмәткә наразлиқ билдүргән пуқраларниң техиму көп түрмигә ташлинишиға сәвәб болидикән.

Хитайда гунаһсиз кишиләрниң түрмиләргә солиниши, мәһбусларниң қаттиқ қейин - қистаққа елиниши вә мәһбуслар бәһримән болушқа тегишлик һоқуқларниң чәклиниватқанлиқи хәлқара кишилик һоқуқ тәшкилатлири тәрипидин изчил түрдә тәнқид қилинип кәлмәктә. (Әқидә)

Пикирләр (0)
Share
Толуқ бәт