Xitayning "emgek bilen özgertish" tüzümi islah qilinmaqchi

Fransiye agéntliqining peyshenbe küni bergen xewiride körsitilishiche, xitay hökümiti uzundin béri tenqidke uchrap kéliwatqan "emgek bilen özgertish" tüzümini islah qilishni pilan qilghan. Bu xewer xitay organ metbu'atliridin hésablan'ghan "jonggu géziti" ning in'gliz tilida chiqidighan nusxisida ashkarilan'ghan.

Xitay hökümitining mezkur " emgek bilen özgertish" qanunigha asasen, saqchi da'iriliri, sot teripidin höküm chiqirilmighan, shuningdek yinik derijide jinayet sadir qilghan kishlerni, emgek bilen özgertish ornida eng uzun bolghanda 4 yilgha qeder qamap qoyalaydiken.

"Jonggu géziti" de yene ashkarilinishiche, xitay memliketlik qurultiyining bu yil 10 ‏- ayda ötküzilidighan yighinida, "emgek bilen özgertish " tüzümining munasiwetlik qanun lahiyisini qaytidin tekshürüp chiqish qarar qilin'ghan , emma mezkur qanun layihisining qanchilik derijide özgertilishi nöwette kishilerde guman qozghawatqan muhim mesililerdin biri iken.

Küzetküchilerning bildürishiche, xitay puqralirining hökümetke bolghan narazliqining künsayin éshishigha egiship, xitay saqchiliri neziride jinayetchi dep qaralghan kishiler, mesilen yerliri mejburiy tartiwilin'ghan erzdarlar we hökümetke qarshi pikir bayan qilghan öktichilerning , sotning hökümisiz 4 yil qamap qoyulishi, xitayda hökümetke narazliq bildürgen puqralarning téximu köp türmige tashlinishigha seweb bolidiken.

Xitayda gunahsiz kishilerning türmilerge solinishi, mehbuslarning qattiq qéyin - qistaqqa élinishi we mehbuslar behrimen bolushqa tégishlik hoquqlarning chekliniwatqanliqi xelq'ara kishilik hoquq teshkilatliri teripidin izchil türde tenqid qilinip kelmekte. (Eqide)