Байлиқи мол уйғур елидә газ йетишмәслик әһвали көрүлди

Әзәлдин "йери кәң, байлиқ мәнбәси мол" дәп сүпәтлинип кәлгән уйғур елидә енергийә йетишмәслик әһвали көрүлди. Үрүмчидә тәбиий газ йетишмәслик әһвали көрүлгән болса , нурғун иссиқлиқ билән тәминләш ширкәтлири көмүр йетишмәслик қийинчилиқиға дуч кәлмәктә.

Уйғур елидә чиқидиған "пайтәхт истималчилар гезити" вә "хитай яшлар гезити" ниң бу һәқтики хәвиригә қариғанда, үрүмчидә нурғун аһалиләр һазир газ йетишмәслик сәвәбидин мунасивәтлик һөкүмәт орунлириға пикир қилған. Шундақла улар һазир нөвәттики бу тәбиий газ йетишмәслик әһвалиниң аптомобилға ишлитилидиған газниң йетишмәсликиниму кәлтүрүп чиқиришидин әндишә қилмақта.

Үрүмчи шәһәрлик йеқилғу газ һәссидарлиқ ширкити, тәбиий газ йетишмәслик әһвалиниң асаслиқи қиш пәсли келиши билән үрүмчидики аһалиләрниң газ ишлитиш миқдариниң ешиши сәвәбидин келип чиққанлиқини билдүрди. Әмма уйғур көзәткүчиләр, тәбиий газ вә нефит байлиқи мол уйғур районида газ йетишмәсликигә, хитайниң бу байлиқларни башқа өлкиләргә көп миқдарда йөткәп кетиши сәвәб болғанлиқини билдүрмәктә.

Хәвәрдә көрситилишичә, үрүмчидә һазир йәнә 10 ға йеқин газ понкитлири тақиветилгән һәмдә нурғун такси машинилири газ йетишмәслик сәвәбидин хизмәт тохтутушқа мәҗбур болған. (Пәридә)