Bayliqi mol Uyghur élide gaz yétishmeslik ehwali körüldi

Ezeldin "yéri keng, bayliq menbesi mol" dep süpetlinip kelgen Uyghur élide énérgiye yétishmeslik ehwali körüldi. Ürümchide tebi'iy gaz yétishmeslik ehwali körülgen bolsa , nurghun issiqliq bilen teminlesh shirketliri kömür yétishmeslik qiyinchiliqigha duch kelmekte.

Uyghur élide chiqidighan "paytext istimalchilar géziti" we "xitay yashlar géziti" ning bu heqtiki xewirige qarighanda, ürümchide nurghun ahaliler hazir gaz yétishmeslik sewebidin munasiwetlik hökümet orunlirigha pikir qilghan. Shundaqla ular hazir nöwettiki bu tebi'iy gaz yétishmeslik ehwalining aptomobilgha ishlitilidighan gazning yétishmeslikinimu keltürüp chiqirishidin endishe qilmaqta.

Ürümchi sheherlik yéqilghu gaz hessidarliq shirkiti, tebi'iy gaz yétishmeslik ehwalining asasliqi qish pesli kélishi bilen ürümchidiki ahalilerning gaz ishlitish miqdarining éshishi sewebidin kélip chiqqanliqini bildürdi. Emma Uyghur közetküchiler, tebi'iy gaz we néfit bayliqi mol Uyghur rayonida gaz yétishmeslikige, xitayning bu bayliqlarni bashqa ölkilerge köp miqdarda yötkep kétishi seweb bolghanliqini bildürmekte.

Xewerde körsitilishiche, ürümchide hazir yene 10 gha yéqin gaz ponkitliri taqiwétilgen hemde nurghun taksi mashiniliri gaz yétishmeslik sewebidin xizmet toxtutushqa mejbur bolghan. (Peride)