Бир бөләк хитай зиялийлири хитайдики әйдиз паалийәтчисиниң қолға елиниши вә униң ағдурмичилиқ җинайити билән әйибләнгәнликигә наразилиқ билдүрүп хитай һөкүмитигә очуқ хәт язди вә хитай һөкүмитидин олимпиктин бурун кишилик һоқуқни яхшилашни тәләп қилди.
Ройтерс агентлиқиниң көрситишичә, очуқ хәткә адвокат, академик алимлар, муһәррирләр, язғучилар вә кишилик һоқуқ паалийәтчилири болуп 57 адәм имза қойған болуп, хәттә әйдиз паалийәтчиси ху җияниң қолға елиниши вә ағдурмичилиқ җинайити билән әйиблинишини " қобул қилғили болмайду" дәп көрситип, униң иш паалийитиниң, әксичә хитай асасий қанунида қоғдилиши керәклики әскәртилгән.
Хәткә имза қойғучилар һөкүмәтниң пурсәтни чиң тутуп, инақ җәмийәткә йол ичип олимпикниң хитайға һәқиқий берилгәнликини испатлиши керәкликини оттуриға қойған.
Хәттә йәнә, һазир түрмидә җигәр кесилиниң дәрдини тартиватқан хитай әйдиз паалийәтчиси ху җяниң дәрһал қоюп берилиши тәләп қилинған болуп, мәзкур хәт хитай кишилик һоқоқ һимайичиси тәшкилати тәрипидин мухбирларға әвәтип берилгән.
Алдинқи һәптә явропа парламенти президенти ханс герт поттериң бейҗиң даирилирини ху җяни қоюп беришкә чақирип, олимпикниң хитай үчүн, дуня җамаәтчилики алдида кишилик һоқуқни һөрмәтләйдиған бир дөләт икәнликини испатлайдиған бир пурсәт икәнлики оттуриға қойған.
Өткән йили ху җя вә униң аяли зен җинйән чәтәлдә ечилидиған бир йиғинға қатнишиш үчүн йолға чиққанда, дөләт мәхпийәтликигә тәһдит селиш җинайити билән әйиблинип чегрида тосувелинған болуп, шундин етибарән түрмидә ятмақта. (Җүмә)
