Xitay Uyghur yéziliridin her yili 300 ming kishini yötkimekchi

Xitay axbarat wastilirining xewirige qarighanda ,12- dékabir axirlashqan Uyghur aptonom rayonluq 7- nöwetlik komitétining 5 - omumiy yighinida Uyghur élining jenubidiki ikki wilayet we bir oblast tewesidiki yézilarda 1milyon 300 ming déhqan‏ - charwichigha téxnika terbiyisi élip bérip "bir a'ilidin bir kishini ishqa orunlashturush" siyasitini emeliyleshtürüsh tekitlen'gen.

Tengritagh torida bérilgen xewerde ashkarilinishiche, xitay Uyghur élide "11- besh yilliq" pilanning kéyinki mezgilde Uyghur yézilirida "her yili izchil halda 300 ming kishini yötkep ishqa orunlashturushqa kapaletlik qilip , yiligha texminen 1 milyon 500 mingdin köprek kishini emgek - mulazimet arqiliq kirim qilishqa" qatnashturushni pilan qilghan.

Bu xildiki qarar, 2006- yili 7- noyabir échilghan Uyghur aptonom rayonluq xelq hökümiti 33- qétimliq yighinida élin'ghan bolup yézilardiki 1 milyon 550 ming emgek küchini yötkesh békitilgen idi.

Mushu qararning rohigha asasen xitay hökümiti we Uyghur ili yerlik hökümet tarmaqliri 2006- yilining axiridin bashlap, yézilardiki éshincha emgek küchlirini yötkep ishqa orunlashturush bahanisi bilen, Uyghurlirining jenubidiki yéza ‏- qishlaqlardin minglap Uyghur qizlirini xitay ölkilirige élip ketken bolup, bu dunyaning herqaysi jayliridiki Uyghurlarni intayin bi'aram qilghan idi.

Namini ashkarilashni xalimighan bir Uyghur ziyaliyning bildürüshiche, Uyghur élide éshincha emgek küchlirini yötkesh siyasitining qayta tilgha élinishi Uyghur élide yene türkümlep Uyghur yashlirini bashqa jaylargha yaki xitay ölkilirige mejburiy yötkesh ishlirini siyasiy destek bilen teminlep Uyghur yashlirining xitay ölkiliride yaki bashqa yaqa yurtlarda sersan bolushigha seweb bolidiken. (Jüme)