Хата диагноз бир уйғур боваққа қатил болди


2007-10-25
Share

Шинхуа ториниң 24- өктәбир хәвиридин ашкарилинишичә, үрүмчи людаван дохтурханиси 33 яшлиқ исми а билән башлинидиған бир һамилдар аялға әйдиз вируси билән юқумланғанлиқи һәққидә хата диагноз қоюп, униң қорсиқидики бәш айлиқ төрәлмисини мәҗбурий чүшүрүш оператсийиси қилған. Бу аял кейин башқа дохтурханида қайта тәкшүрүш арқилиқ өзиниң H I V билән юқумланмиғанлиқини испатлиғандин кейин, мәзкур дохтурхана үстидин сотқа әрз қилип, хата диагнозниң балисиға қатиллиқ қилғанлиқи һәм бу җәрянда еғир җисманий һәм роһий азаб тартқанлиқиниң бәдилини төләшни тәләп қилған. Йерим йилчә давамлашқан әрзниң нәтиҗисидә, сотниң һөкүми билән бу дохтурхана зиянкәшликкә учриғучиға 74 миң 880 йүән төләм төлигән.

Гәрчә хәвәрдә бу хата диагноз түпәйли еғир бәдәл төлигән бу аялниң толуқ исми берилмигән болсиму, әмма людаван дохтурханисидин игилишимизчә,бу аял 33 яш әтрапидики уйғур аял икән.

Хәвәрдә дейилишичә, зиянға учриғучи аял2006 - йили 10- айда һамилдар болуп аилиси зор хошаллиққа чөмгән. Күтүлмигән йәрдин у бала бәш айлиқ болғанда, йәни бу йил 3- айда лю даван дохтурханисида елип берилған қан тәкшүрүштә униң H I V вируси билән юқумланғанлиқи һәққидә диагноз қоюлған. Һәмдә дохтурхана униң балисиниң бинормал туғулидиғанлиқини билдүрүп дәрһал балини чүшүрүш оператсийиси қилған.

Шуниңдин кейин еғир җисманий һәм роһий азабқа дучар болған бу бәхтсиз аял, өзиниң әйдиз вирусидин юқумлинип қелишиға қайил болмай, ахири шинҗаң медитсина университети биринчи дохтурханиси һәмдә уйғур аптоном районлуқ хәлқ дохтурханиси қатарлиқ бир қанчә чоң дохтурханиларда қайта тәкшүрткәндә,өзиниң әйдиз билән юқумланмиғанлиқи ениқланған. Қайтидин ғәйрәткә кәлгән бу уйғур аял ахири хата диагноз арқилиқ тартқан азаблириниң төлимини төлитишни тәләп қилған. Әсли у бу дохтурханидин икки йүз миң юән төләм тәләп қилған икән.

Әйдиз мутәхәссислири мушуниңға охшаш хата диагнозларниң елип келидиған биһудә азаблиридин сақлиниш үчүн өзидин гуманланған әйдиз юқумдарлириниң, бирәр кичик амбулаторийә вә яки дохтурханиниң өзи үстидин чиқарған бирдин ‏-бир диагнози арқилиқла давалиниш яки башқа тәдбир қоллиништин бурун йәнә, башқа чоң дохтурхана яки диагноз қоюш сәвийиси бир қәдәр юқири орунларда қайта тәкшүртүш арқилиқ тоғра диагнозға еришишини тәвсийә қилиду. (Гүлчеһрә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт