Үрүмчи әйдиз кесилиниң тарқилиши җәһәттә уйғур или бойичә алдинқи шәһәр болуп қалди


2007.08.24

Хитай даирилириниң алдинқи күни ашкарилишичә, уйғур аптоном райониниң мәркизи үрүмчи, әйдиз вирусиниң тарқилиш нисбити җәһәттә или вилайитидин өтүп уйғур аптоном райони бойичә 1- орунға чиққан. Даириләр йәнә, зәһәрлик чекимлик чекиш сәвәбидин әйдиз вируси юқтурувалғучиларниң %70 үрүмчигә мәркәзләшкәнликини билдүрмәктә.

Лекин даириләр үрүмчидә зади қанчилик кишиниң әйдиз вирусида юқумланғанлиқини елан қилмиди. Үрүмчи шәһәрлик җ х идариси алдинқи күни ахбарат елан қилиш йиғини чақирип, зәһәрлик чекимлик әһвалиниң үрүмчидә барғансири еғирлишиватқанлиқини агаһландурди. Мунасивәтлик даириләр, уйғур аптоном районида зәһәрлик чекимликни окул қилип селиш усули әйдиз вирусиниң тарқилишидики әң муһим қаналларниң бири, дәп көрсәтмәктә.

Үрүмчи шәһәрлик җ х идариси зәһәрлик чекимликкә қарши туруш әтритиниң сияси комиссари җен җиңниң, үрүмчидә зәһәрлик чекимликкә мунасивәтлик җинайи һәрикәтләрниң наһайити еғир әһвалда икәнликини билдүргән. Америкидики мәшһур тәтқиқат органлириниң бири болған истиратегийә вә хәлқара тәтқиқат мәркизи өткән айда елан қилған бир доклатида, әйдиз вируси уйғур илида буниңдин кейинки 5 йил ичидә үзликсиз кеңийидиғанлиқини, қәшқәрдә әйдиз билән юқумланған һамилдар аялларниң %5 тин ашқанлиқини, бу әһвалниң ғулҗида %3, турпанда %4дин ашидиғанлиқини вә әйдиз кесили асаслиқи райондики йәрлик милләтләрдә тарқиливатқанлиқини илгири сүргән. Хитай мәтбуатлириниң йеқинда ашкарилишичә, қаримайда бу йилниң дәсләпки 6 ейида байқалған 13 нәпәр әйдиз вирусиниң 11 нәпирини уйғурлар игәллигән. Америка истиратегийә вә хәлқара тәтқиқат мәркизи, хитай сәһийә вә бихәтәрлик органлирини әйдиз кесилини чәкләш мәсилисидә өз ара яхши маслашмайватқанлиқини тәкитлигән. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.