Xitay sherqiy türkistan küchlirini xelq'ara zeherlik chékimlik guruhi bilen til biriktürmekte, dep eyiplidi


2006.07.18
Share on WhatsApp
Share on WhatsApp

Xitayda chiqidighan "xelq'ara awan'gard yitekchiler" géziti, sherqiy türkistan küchlirini xelq'ara zeherlik chékimlik guruhi bilen til biriktürmekte, dep eyiplidi.

Dunya Uyghur qurultiyi yéqinda xitay hökümiti Uyghur teshkilatlirini "altun hilal'ay" rayonidiki zeherlik chékimlik guruhi bilen baghlimaqchi, dep eyipligen. "Xelq'ara awan'gart yitekchiler" gézit bu heqtiki xewiride, chet'eldiki Uyghur teshkilatlirini afghanistanning altun hilal'ay rayonidin zeherlik chékimlik yötkeydighan guruhlar bilen til biriktürüp, tapqan puligha qoral - yaraq sétiwalmaqta we bu sodini jonggoning ichkiri ölkilirigiche kéngeytmekte, dep eyipligen.

Dunya Uyghur qurultiyining qazaqistandiki wekili qehriman ghojamberdini zeherlik chékimlik guruhi uyushturmaqta, dep tekitligen xewerde "qazaqistanda yashaydighan Uyghur xelq partiyisining rehbiri qehriman ghojamberdi adem ewetip chigrimiz ichide zeherlik chékimlik guruhi uyushturghan we chigra éghizidin dölitimizge zeherlik chékimlik yötkimekchi bolghan," deydu.

Bu xitay metbu'atlirining tunji qétim bir Uyghur siyasi rehbirini zeherlik chékimlik etkeschiliki bilen eyiplep ismini ashkare tilgha élishidur. Lékin " xelq'ara awan'gart yitekchiler "gézitining bu xewiri dunya Uyghur qurultiyining ret qilishigha uchridi. Dunya Uyghur qurultiyining bayanatchisi dilshat rishit, xitay Uyghur rehberlirini térorchi, dep aqturulmighandin kéyin ulargha töhmet qilish usulini qollanmaqta, didi.

Qehriman ghojamberdi milliy dawayimiz sépidiki mes'uliyet tuyghusi küchlük we iradisi mustehkem rehberlimizning biri, dep tekitligen dilshat rishit," xelq'ara awan'gart yitekchiler gézitining xewiri xitay da'irilirining tigh uchini qehriman ghojamberdige qaratqanliqini körsetmekte," dep körsetti. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.