Uyghur élide tuyaq-éghiz yallughi késili qayta bayqaldi

Birleshken döletler teshkilatigha qarashliq ozuqluq we yéza igilik orgini charshenbe küni, Uyghur élidiki 40 tuyaq kalida tuyaq-éghiz yallughi késilining bayqalghanliqini melum qildi.

Fransiye axbarat agéntliqining xewirige qarighanda, tuyaq-éghiz yallughi késili Uyghur élining lopnur nahiyiside bayqalghan bolup, bu késelning tarqilishining aldini élish üchün, hökümet da'iriliri késel bayqalghan 40 tuyaq kaligha qoshup, ular bilen birge turghan 300 ge yéqin kalini öltürgen.

Xitayning yéza igilik ministirliqi derhal b d t ozuqluq we yéza igilik orginigha doklat sunup, tuyaq-éghiz yallughi késilining aldi élin'ghanliqini melum qilghan. Emma mezkur ministirliq téxi ötken ayda, bu organ'gha oxshash doklat élan qilip, bu késelning tarqilishini ongushluq kontrol qiliwalghanliqini bildürgen idi. Uyghur élide bu késelning qayta bayqilishi, nöwette b d t ozuqluq we yéza igilik orginini endishige salmaqta.

Bu yil 4 - aydin hazirghiche bolghan ariliqta tuyaq-éghiz yallughi késili ilgiri-axir bolup xitayning xébéy, shendong, jyangsu ölkisi shundaqla Uyghur élide bayqilip, hazirghiche 4 mingdin oshuq kala mushu sewebtin öltürüp tashlan'ghan.

Tuyaq-éghiz yallughi késili yene "5 - nomurluq késel" depmu atilidighan bolup, bu hetta 2004 - yili 10 - ayda ili oblastigha qarashliq her qaysi charwichiliq meydanlirida bayqalghan idi. Emma u chaghda xitay hökümiti buni mexpiy tutup ammidin yoshurghan idi. (Peride)