Fukang kömür kanida ölgenlerning sani 76 ge yetti

Xitay xewer agéntliqining 12 - iyul küni chüshtin kéyin fukangdin xewer qilishiche, shénglung kömür kanida yüz bergen partlash hadisiside ölgenlerning sani 76 kishige yetken. Qalghan 7 neper kan ishchisining aqiwiti téxi éniq emes iken.

Uyghur diyaridiki kan ishliri bixeter ishlepchiqirishni nazaret qilish idarisining mes'ul mutexessisi neq meydandiki tekshürüsh, qutquzush ishliri toghrisida muxbirlargha bergen melumatida, qutqazghuchi xadimlarning 200 métir chongqurluqta yüz bergen partlash weqesidin kéyin, ikkinchi qétim yene partlash yüz bérishtin saqlinish üchün, aldi bilen kandiki gazning qoyuqluq derijisini töwenlitish, shamal yoli ichish arqiliq weqe yüz bergen jaygha yétip bérip 76 neper kan ishchisining jesidini tapqanliqini bildürdi. U yene, qalghan 7 neper ishchining ornini éniqlap bolghanliqini, emma u jaydiki gaz qoyuqluq derijisi xeterlik ölchimidin yuqiri bolghachqa, qutqazghuchi xadimlarning téxi u yerge baralmaywatqanliqini otturigha qoydi.

Neq meydanda közitish élip bériwatqan xitay döletlik bixeter ishlepchiqirishni nazaret qilish bash idarisining mes'uli, quduq astidiki shara'itqa asaslan'ghanda, qalghan 7 neper kan ishchisining hayatidin ümid kütkili bolmaydighanliqini uqturdi. (Iltebir)