Tarimning néfit gazi tunji qétim béyjinggha yetküzüldi

3 - Awghust küni tarimning tebi'iy gazi, gherbning gazini sherqqe yetküzüsh turuba yoli arqiliq tunji qétim béyjinggha yetküzülgen.

Tengritagh torining xewirige qarighanda, ilgiri béyjinggha teb'iy gazni izchil shenshi changching néfitliki teminlep kelgen bolup, kéyin shenshi-béyjing liniyisidiki gaz bilen teminlesh miqdari barghanséri cheklimige uchrighachqa, béyjingning gaz ishlitish éhtiyajini qanduralmay qalghan.

Uyghur élide chiqidighan mezkur tor béti xewiride, "paytext xelqining gaz ishlitish éhtiyajini qandaq kapaletlendürüsh, junggo néfit pay shirkiti eng köngül bölüdighan mesile. Paytexttiki ahaliler buningdin étibaren wetinimizning eng gherbidin yetküzülgen pakiz gazni ishliteleydighan boldi" dep yazghan.

Nöwette xitayning Uyghur élide élip bériwatqan néfit qézish xizmitidiki qedimi barghanséri tizliship, néfit qézish da'irisi téximu kéngiyiwatqan bolup, ular yene yéqindila aqsu wilayitining néfit, tebi'iy gaz bayliq belwighining merkizidiki yéngi mehelle gazliqini qidirish ishliri üchün 4 milyard 200 milyon yu'en meblegh saldi. (Peride)