Xitay gherbning gazini sherqqe yötkeydighan 2 - gaz turuba liniyisini yasimaqchi


2006.03.31

Junggo néfit shirkiti, nüwettiki tarim - shangxey teb'iy gaz turubisining kölimini kéngeytish bilen birge, buninggha parallil qilip 2 - bir teb'iy gaz turuba liniysini yasash pilani üstide tetqiqat élip barmaqta iken.

Junggo maliye - iqtisad gézitining xewer qilishiche, junggo néfit shirkiti layihilesh inistitutining bir emeldari, 2 - teb'iy gaz turuba liniyisining Uyghur aptonom rayonidin bashlinidighanliqini, lékin hazirche qeyerdin bashlinidighanliqi téxi muqimlashmighanliqini bildürgen. Shuning bilen birge ,junggo néfit shirkiti tarim - shangxey teb'iy gaz turubisining kölimini kéngeytip, yiligha 12 milyard kup métir gaz éqitish sighimini 17 milyard kup métirgha chiqarmaqchi iken.

Nöwette mezkur gaz turubisi xitay ölkilirini yiligha 8 milyard kup métir teb'iy gaz bilen teminlimekte. Lékin mezkur qurulush sherqiy türkistan teshkilatliri we xelq'ara muhit qoghdash organliri teripidin yerlik xelqning bayliqini talang qilish we muhitqa buzghunchiliq qilish rolini oynaydu, dep eyiblen'gen. Lékin xitay hökümiti bu qurulush yerlik xelqning iqtisadi ehwalini yaxshilash rolini oynaydu, dep aqlimaqta. Maliye - iqtisad géziti bu heqtiki xewiride, "yéngi qurulidighan teb'iy gaz turubisi sherqtiki éléktir istansilirining künséri küchiyiwatqan teb'iy gaz éhtiyajini qamdashni meqsed qilghan " deydu.

Közetküchilerning eskertishiche, xitay hökümiti gherbning gazini sherqqe yötkesh qurulushi yerlik iqtisadni güllendürüsh rolini oynaydu dep tekitlisimu,lékin tarim we jungghar oymanliqida néfit ‏- teb'iy gaz échiwatqan shirketler Uyghurlardin ishchi - xizmetchi élishni ret qilmaqta. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.