Sabiq güentanamo tutquni adil abdulhékim shwétsiyidin resmiy siyasiy panahliq tilidi

Kubaning güentanamo arilidiki amérika tutqunlar lagiridin qoyup bérilgendin kéyin, albaniyige orunlashturulghan güentanamo tutquni adil abdulhékim, aldinqi küni shwétsiye da'iriliridin resmiy siyasiy panahliq telep qilghan.

Amérikida chiqidighan "xuntington pochta géziti"ning eskertishiche, shwétsiyide chaqirilghan bir kishilik hoquqi yighinigha qatnishish üchün albaniyidin kelgen adil abdulhékim, shwétsiye da'irilirige siyasiy panahliq iltimasini resmiy tapshurghan.

Nöwette adil abdulhékim bilen bille gu'antanamodin albaniyige yolgha sélin'ghan qalghan 4 neper Uyghur dawamliq albaniyide yashimaqta. Adil abdulhékimning xélsinki kishilik hoquqi komitéti shwétsiyide chaqirghan kishilik hoquqi yighinigha qatnishish pursiti, uninggha shwétsiyide yashaydighan achisi bilen 8 yildin kéyin tunji qétim jem bolush pursiti yaratqan idi. "Xuntington pochta géziti", albaniyidiki turmush adil abdulhékim qatarliq besh neper musapirgha til qiyinchiliqi yaritipla qalmay, ularning kilechikige ishench béghishliyalmighanliqini ilgiri sürgen. Chet'el metbu'atliri bolsa bu kishilerning yerlik tili, örp - aditi bilen natonush, Uyghur jama'iti bolmighan bir döletke orunlashturulghanliqini tenqid qilip,ularni gérmaniye yaki shimaliy yawropadiki nopus sani köp bolmisimu Uyghur jama'iti bar, shwétsiyige oxshash döletlerge orunlashturushning aqilane bolidighanliqini ilgiri sürgen.

Lékin shwétsiye hökümiti adilning iltimasigha hazirgha qeder héchqandaq ipade bildürmidi. Közetküchilerning eskertishiche, eger adilning iltimasi qobul qilinsa, bu albaniyide qalghan bashqa musapirlarning buningdin kéyin 3 - bir döletke bérip panahliq tilesh yolini échishi mumkin. (Erkin)