Amérika tashqi ishlar ministirliki: gu'entanamodiki Uyghurlar xitaygha qayturulmaydu

Amérika tashqi ishlar ministirliki kubaning gu'entanamo arilidiki amérika tutqunlar lagirida tutup turuliwatqan Uyghurlarning xitaygha qayturulmaydighanliqini bildürdi.

Amérika tashqi ishlar ministirliqi bayanatchisi adam ereliy, peyshenbe künki muxbirlarni kütüwélish yighinida, "gu'entanamodiki her qandaq bir tutqunni qayturush sherti uninggha xewp yetmeydighan bolushi we qayturulghan dölette ziyankeshlikke uchrimasliqi kérek," dep körsetti. Uning eskertishiche, amérika bu yerdiki tutqunlar qayturulghandin kéyin yene térorizim bilen shughullunishidin ensireydiken.

Adam ereliy Uyghurlarning mesilisini tilgha alghanda, "Uyghurlar qeyerge qayturush mesilide, ular junggogha qayturulsa ularning ziyankeshlikke we adaletsiz mu'amilige uchrash mumkinchiliki endishe yaritiwatidu," dédi.

Adam erelining eskertishiche, amérika ularni qobul qilishni xalaydighan 3 - bir dölet tépishke tirishmaqta. U, eger ularni qobul qilidighan 3 - bir dölet chiqmisa amérikining qandaq qilidighanliqini sorighan bir muxbirgha "biz ularni orunlashturidighan 3- bir dölet üstide jiddi izdiniwatimiz," deydu.

Xitay tashqi ishlar ministirliki, re'is xu jintaw amérikini ziyaret qiliwatqanda gu'entanamodiki Uyghur tutqunlarni jonggo qayturup bérishni telep qilghan. Xitay tashqi ishlar ministirliki bayanatchisi chin gang, bu yerdiki Uyghurlarni "térrorchilar", dep atighan idi.

Xitayda "térrorchi" dep eyiblen'gen Uyghurlargha ölüm jazasi bérilmekte. Xitay hökümiti 2005 - yili 10 - ayda pakistan da'iriliri teripidin ötküzüp bérilgen siyasi musapir isma'il semetni ölüm jazasigha höküm qilghan. (Erkin)