Хитай мутәхәссисләр, гувантанамодики уйғурлар адил сотлинатти диди


2004-08-16
Share

Америка ташқи ишлар министири колин повәл, америкиниң гувантанамодики уйғур тутқунларни хитайға қайтуруп бәрмәйдиғанлиқини җакарлиғандин кейин, хитайдики нопузлуқ мутәхәссисләр, хитай қоң қуруқлуқниң һазирқи мәвҗут қанун систәмисини ақлап , уйғур тутқунларниң адил сотлинишиға капаләтлик қилатти дәп көрсәтти.

Хитай һәрбий пәнләр академийисиниң тәтқиқатчиси сун дангән, хитайда чиқидиған “ қанунчилиқ кәчлик гезити”гә баянат берип, хитайниң қанун системиси тәрәққи қилған, шәрқий түркистан бөлгүнчилири мушу қанунлар бойичә сотлинатти дәп тәкитлигән.

Сун дангән, америка билән хитайниң шәрқий түркистан бөлгүнчилиригә қарши һәмкарлиқ елип барғанлиқини әскәртип, америкиниң шәрқий түркистан ислам һәркитини террорлуқ тәшкилатлар тизимликигә алғанлиқини илгири сүргән. Колин повәл, америкиниң гувантанамодики уйғурларни үчүнчи бир дөләткә әвәтиш йоллири үстидә издиниватқанлиқини билдүргәниди. Сун дангән, хитай билән дипломатич мунасивити бар дөләтләр уйғур тутқунларни қобул қилмайду дәп қарайдиғанлиқини, бирақ хитайниң терроризмға қарши урушни давамлиқ қоллайдиғанлиқини билдүргән.

Гувантанамодики 600 дәк тутқунниң 22 нәпири уйғур. Колин повәл, 4 күнниң алдида әркин асия радиосиниң мухбири билән вашиңтондики японийилик мухбирларни қобул қилип , гувантанамодики уйғурларниң хитайға қайтурулмайдиғанлиқини җакарлиғаниди. Хитайлар һазирғичә гувантанамодики уйғурларни қайтурувелишқа тиришип, америка даирилири билән көп қетим сөһбәт елип барған. Америка һөкүмити вә кишилик һоқуқ тәшкилатлири болса хитайни терроризмға қарши уруштин пайдилинип уйғурларниң кишилик һоқуқини дәпсәндә қилмаслиққа көп қетим агаһландурған. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт