Xitay mutexessisler, guwantanamodiki Uyghurlar adil sotlinatti didi


2004.08.16

Amérika tashqi ishlar ministiri kolin powel, amérikining guwantanamodiki Uyghur tutqunlarni xitaygha qayturup bermeydighanliqini jakarlighandin kéyin, xitaydiki nopuzluq mutexessisler, xitay qong quruqluqning hazirqi mewjut qanun sistemisini aqlap , Uyghur tutqunlarning adil sotlinishigha kapaletlik qilatti dep körsetti.

Xitay herbiy penler akadémiyisining tetqiqatchisi sun dan'gen, xitayda chiqidighan “ qanunchiliq kechlik géziti”ge bayanat bérip, xitayning qanun sistémisi tereqqi qilghan, sherqiy türkistan bölgünchiliri mushu qanunlar boyiche sotlinatti dep tekitligen.

Sun dan'gen, amérika bilen xitayning sherqiy türkistan bölgünchilirige qarshi hemkarliq élip barghanliqini eskertip, amérikining sherqiy türkistan islam herkitini térrorluq teshkilatlar tizimlikige alghanliqini ilgiri sürgen. Kolin powel, amérikining guwantanamodiki Uyghurlarni üchünchi bir döletke ewetish yolliri üstide izdiniwatqanliqini bildürgenidi. Sun dan'gen, xitay bilen diplomatich munasiwiti bar döletler Uyghur tutqunlarni qobul qilmaydu dep qaraydighanliqini, biraq xitayning térrorizmgha qarshi urushni dawamliq qollaydighanliqini bildürgen.

Guwantanamodiki 600 dek tutqunning 22 nepiri Uyghur. Kolin powel, 4 künning aldida erkin asiya radi'osining muxbiri bilen washingtondiki yaponiyilik muxbirlarni qobul qilip , guwantanamodiki Uyghurlarning xitaygha qayturulmaydighanliqini jakarlighanidi. Xitaylar hazirghiche guwantanamodiki Uyghurlarni qayturuwélishqa tiriship, amérika da'iriliri bilen köp qétim söhbet élip barghan. Amérika hökümiti we kishilik hoquq teshkilatliri bolsa xitayni térrorizmgha qarshi urushtin paydilinip Uyghurlarning kishilik hoquqini depsende qilmasliqqa köp qétim agahlandurghan. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.