ئامېرىكا ئاممىۋى رادىئوسى گۇانتانامودىكى ئۇيغۇرلارنىڭ ئادۋوكاتىنى زىيارەت قىلدى
2005.08.21
گۇانتانامودىكى ئۇيغۇرلارنىڭ ئادۋوكاتى سېيبىن ۋىللېت ئەپەندى يېقىندا، ئامېرىكىدىكى داڭلىق دۆلەتلىك ئاممىۋى رادىئو ئىستانسىسىنىڭ زىيارىتىنى قوبۇل قىلىپ، گۇانتانامودىكى ئۇيغۇرلارنىڭ ئەھۋالىنى تونۇشتۇردى.
دۆلەتلىك ئاممىۋى رادىئو ئىستانسىسىنىڭ بوستوندىكى تارمىقىنىڭ مۇخبىرى، ئادۋوكات سېيبىن ۋىللېت بىلەن ئۆتكۈزگەن مەخسۇس سۆھبىتىدە، ئامېرىكىنىڭ كۇبادىكى گۇانتانامو تۈرمىسىدە 3 يىلدىن بۇيان تۇتۇپ تۇرىلىۋاتقان ئۇيغۇرلارنىڭ قانداق قولغا ئېلىنغانلىقى ۋە ئۇلارنىڭ ھازىرقى ئەھۋالى ھەققىدە سوئال قويدى.
ئادۋوكات سېيبىن ۋىللېت، ئۇيغۇرلارنىڭ "شەرقىي تۈركىستان" لىقلار ئىكەنلىكىنى، شۇنداقلا ئۇلار خىتاي ھۆكۈمىتىنىڭ كونتروللىقىغا نارازى بولۇپ، گۇانتانامودىكى ئۇيغۇرلارنىڭمۇ خىتايغا قارشى تۇرۇش مەقسىتىدە ئافغانىستاندىكى تالىبان قوشۇنلىرىغا قاتنىشىپ قالغانلىقىنى، ھەتتا ئامېرىكا ھۆكۈمىتىنىڭمۇ ئۇلارنى "ئۈشمەن كۆرەشچىلىرى ئەمەس"دەپ جاكارلىغانلىقىنى بىلدۈردى.
ئۇ سۆھبەتتە يەنە، بۇ ئۇيغۇرلارنى خىتايغا قايتۇرۇشقا قەتئىي بولمايدىغانلىقىنى، چۈنكى ئۇلار خىتايغا قايتۇرۇلسا، ئۆلۈم جازاسىغا ئۇچرىشى مۇمكىنلىكىنى ئەسكەرتتى.
ئامېرىكا پايتەختى ۋاشىنگتوندىكى بىر فېدېرال سوت مەھكىمىسى نۆۋەتتە ئادۋوكات سېيبېئىن ۋىللېتنىڭ، گۇانتانامودىكى ئىككى نەپەر ئۇيغۇرنى قويۇپ بېرىش ياكى ئۇلارنى تۈرمىدىن بوشىتىپ، ھەربىي بازا ئىچىدە ئەركىن پائالىيەت ئېلىپ بېرىشقا يول قويۇش تەلەپ قىلىنغان ئەرزنامىسى ئۈستىدىن سوت ئاچماقتا. (پەرىدە)
مۇناسىۋەتلىك ماقالىلار
- ئامېرىكا گۇانتانامودىكى كىشىلەرنى دۆلىتىگە قايتۇرۇش ئۈچۈن دۆلەتلەر بىلەن سۆھبەتلەشمەكتە
- گۇانتانومودىكى ئۇيغۇرلارغا سىياسىي پاناھلىق بېرىش كېرەك
- ئامېرىكا سوتى گۇانتانامودىكى ئىككى ئۇيغۇر ئۈستىدىن سوت ئاچتى
- ئامېرىكىلىق ئادۋوكات: گۇانتانامودىكى ئۇيغۇرلارنى مېھمانخانىغا يۆتكەش كېرەك
- گۇانتانامودىكى ئۇيغۇر تۇتقۇنلارنىڭ ئادۋوكات تۇتۇشىغا رۇخسەت قىلىندى