Gu'antanamodiki Uyghur tutqunlar achliq élan qilish sépige qoshuldi

Amérika hökümiti teripidin gu'antanamodiki tutqunlar lagérigha qamalghan Uyghurlardin 4 kishi, hökümetning ularni "düshmen jengchisi emes" dep élan qilghandin kéyinmu dawamliq qanunsiz tutup turuwatqanliqigha narazi bolup, achliq élan qilish sépige qoshulghan.

Uyghur tutqunlarning adwukatining ashkarilishiche, achliq élan qilish herikitige qoshulghan Uyghurlar sidiq türkistan, exmet, exter we ayup haji memet qatarliqlar iken. Sidiq türkistani se'udi erebistanda tughulghan Uyghur muhajirlardin bolup, u ilgiri osama bin ladén'gha süyqest qilmaqchi, dégen eyiblesh bilen talibanlar türmiside yatqan idi.

B b s ning xewer qilishiche, ötken yili 25 - dékabirghiche tamaq yéyishni ret qilghan tutqunlarning sani 84 ke barghan. Gu'antanamodiki Uyghur tutqunlarning ichide 6 kishi amérika hökümiti teripidin "düshmen jengchisi emes, dep aqlan'ghandin kéyin, araldiki bir qeder erkin heriket qilishqa bolidighan igwana lagérigha yötkep bérilghan idi. Bu qétim achliq élan qilish herikitige qoshulghan sidiq türkistani, exmet, exter we ayup haji memetler mushu lagérda turidiken. Ular mesilisining tézrek bir terep qilinishini telep qilghan.

Yéqinda amérikining bir fédéral sot mehkimisi lagérdiki ababekri qasim, adil ablikimlar üstidin höküm chiqirip, ularni dawamliq lagérda tutup turushni "qanuni prinsiplargha uyghun emes" dep jakarlidi. Buning bilen bu ikki Uyghur amérika hökümiti teripidin düshmen jengchisi emes, dep aqlinipla qalmay, amérika sot mehkimisi teripidinmu aqlan'ghan boldi.

Achliq élan qilish herikitige qatnashqan 4 neper Uyghurning délosi adwokatlar teripidin fédéral sot mehkimisige yollan'ghan, emma sot mehkimisi ular heqqide téxi sot achmighan idi. (Erkin)