Йеңи шафақ гезити: гүантанамодики игә - чақисиз уйғурлар


2006.01.20
Share on WhatsApp
Share on WhatsApp

Түркийидә тайип әрдоған һөкүмити билән йеқин мунасивити барлиқи билән тонулған "йеңи шафақ" гезити җүмә күни гүантанамодики уйғур тутқунлар һәққидә хәвәр елан қилип, бу лагирдики уйғур тутқунларни игә - чақисиз қалди, дәп көрсәтти.

Хәвәрдә истанбулдики шәрқий түркистан вәқпиниң баш катипи һамут көктүркниң сөзини нәқил кәлтүрүп, түркийә ташқий ишлар министири абдулла гөлниң вәқәдин хәвәрдар икәнлики вә түрк һөкүмитиниң, гунаһсизлиқи америка тәрипидин испатланған бу кишиләргә игидарчилиқ қилиши тәләп қилинди. Гезит хәвиридә бу кишиләргә " түркийә қолини сунуши керәк" дәйду.

Америка ташқий ишлар министирлиқи гүантанамодики уйғур тутқунларни орунлаштуридиған 3 - бир дөләт тепишқа тиришмақта. Әмма һазирғичә уларни қобул қилидиған бирәр дөләт чиқмиған. Йеңи шафақ гезити, шветсийә парламент әзаси анилийниң гүантанамодики уйғурларни қобул қилиш һәққидә швет парламентиға тәклип лаһийиси сунғанлиқини алаһидә тилға алди.

Хәвәрдә " америка һөкүмити уйғурларниң тән җазасиға учраш еһтимали барлиқини сәвәб қилип хитайға қайтурмайдиғанлиқини, уларни қобул қилишни халайдиған дөләтләргә өткүзүп беридиғанлиқини елан қилди " дәйду. Йеңи шафақ гезитиниң әскәртишичә, америка даирилири түркийә қатарлиқ 20 дәк дөләткә илтимас қилған болсиму, әмма түркийидин иҗабий җавап алалмиған.

Хәвәрдә мундақ дәйду: америкилиқ даириләрниң қаришичә, уйғурлар хата йәрдә, хата вақитта туруп қалғанлиқтин қолға елинған. Улар гүманлиқ дәриҗиси юқири болмиған вә хитайға дүшмән болғанлиқи сәвәбидин америкиға тәһдит шәкилләндүрмигән."

Йеңи шафақ гезити түркийидә ислами сәзгүрлики билән тонулған оң қанат әнәничи гезитләрниң бири. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.