Yéngi shafaq géziti: güantanamodiki ige - chaqisiz Uyghurlar

Türkiyide tayip erdoghan hökümiti bilen yéqin munasiwiti barliqi bilen tonulghan "yéngi shafaq" géziti jüme küni güantanamodiki Uyghur tutqunlar heqqide xewer élan qilip, bu lagirdiki Uyghur tutqunlarni ige - chaqisiz qaldi, dep körsetti.

Xewerde istanbuldiki sherqiy türkistan weqpining bash katipi hamut köktürkning sözini neqil keltürüp, türkiye tashqiy ishlar ministiri abdulla gölning weqedin xewerdar ikenliki we türk hökümitining, gunahsizliqi amérika teripidin ispatlan'ghan bu kishilerge igidarchiliq qilishi telep qilindi. Gézit xewiride bu kishilerge " türkiye qolini sunushi kérek" deydu.

Amérika tashqiy ishlar ministirliqi güantanamodiki Uyghur tutqunlarni orunlashturidighan 3 - bir dölet tépishqa tirishmaqta. Emma hazirghiche ularni qobul qilidighan birer dölet chiqmighan. Yéngi shafaq géziti, shwétsiye parlamént ezasi aniliyning güantanamodiki Uyghurlarni qobul qilish heqqide shwét parlaméntigha teklip lahiyisi sun'ghanliqini alahide tilgha aldi.

Xewerde " amérika hökümiti Uyghurlarning ten jazasigha uchrash éhtimali barliqini seweb qilip xitaygha qayturmaydighanliqini, ularni qobul qilishni xalaydighan döletlerge ötküzüp béridighanliqini élan qildi " deydu. Yéngi shafaq gézitining eskertishiche, amérika da'iriliri türkiye qatarliq 20 dek döletke iltimas qilghan bolsimu, emma türkiyidin ijabiy jawap alalmighan.

Xewerde mundaq deydu: amérikiliq da'irilerning qarishiche, Uyghurlar xata yerde, xata waqitta turup qalghanliqtin qolgha élin'ghan. Ular gümanliq derijisi yuqiri bolmighan we xitaygha düshmen bolghanliqi sewebidin amérikigha tehdit shekillendürmigen."

Yéngi shafaq géziti türkiyide islami sezgürliki bilen tonulghan ong qanat en'enichi gézitlerning biri. (Erkin)