Amérika dölet mudapi'e ministirliki gu'antanamodiki tutqunlarning tizimlikini élan qildi

Amérika dölet mudapi'e ministirliqi 4 yildin béri gu'antanamoda tutup turuluwatqan tutqunlarning dölet teweliki we isimlikini élan qildi. Biraq tutqunlarning isimliki mexsus bir tizimlik boyiche emes, belki dölet mudapi'e ministirliki teripidin élan qilin'ghan 6 ming betlik höjjette tilgha élin'ghan. Bu höjjet gu'antanamodiki tutqunlarni sotlaydighan amérika alahide herbiy sot kollégiyisining xatirisi bolup, bu xatire burun élan qilin'ghan bolsimu, emma uningda tutqunlarning isimliki we dölet teweliki chiqiriwétilgen idi.

Bu nöwet tutqunlarning isimliki tunji qétim élan qilindi. Bu höjjetning élan qilinishida amérika birleshme axbarat agéntliqining axbarat erkinliki qanuni boyiche otturigha qoyghan telipi muhim rol oynighan.

Texminen 500 dek tutqunning mutleq köpchiliki 3 - 4 yildin béri mezkur lagirda hazirghiche sotlanmay tutup turulmaqta idi. Bular afghanistan we pakistanlarda esir élin'ghan 20 nechche neper Uyghurni öz ichige alidu. Amérika hökümiti hazirghiche bu yerdiki Uyghur tutqunlardin adil ablikim, ababekri qasim qatarliq bir qanche kishiningla ismini élan qilghan .

Höjette abdulghopur isimlik bir Uyghur özbékistan islam partiyisige qatnishish bilen eyiblendi. Emma uning xitaygha qarshi turush üchün herbiy telim - terbiye alghanliqini tekitligen.

Xitay hökümiti gu'antanamodiki Uyghurlarni élip kétishke köp küch chiqarghan bolsimu, biraq amérika hökümiti Uyghur tutqunlar xitaygha qayturup bérilse, hayatigha kapaletlik qilghili bolmaydighanliqini seweb qilip, xitay da'irilirining telipini ret qilghan. Xitay da'iriliri 2002 - yili gu'antanamogha bir tekshürüsh ömiki ewetip, bu yerdiki Uyghurlarni soraq qilghan idi. (Erkin)