Америка, гуәнтанамодики уйғурларниң инсаний муамилигә еришиши үчүн күчигәнликини билдүрди


2006.05.07
Share on WhatsApp
Share on WhatsApp

Америка дөләт мудапиә министирлиқи гуәнтанамодин қоюп берилгән 5 нәпәр уйғур һәққидә баянат берип, америка һөкүмитиниң бу уйғурларниң инсаний муамилигә еришиши үчүн әң чоң тиришчанлиқларни көрсәткәнликини билдүрди.

Мудапиә министирлиқи баянатида, "бизниң асаслиқ нишанимиз, бу уйғурлар үчүн уларниң һаятини қайта башлайдиған бир муһит яритиш. Бу муһитни дәл албанийә яритип бериду" деди. Америка ташқи ишлар министирлиқиму албанийиниң бу уйғурларни қобул қилишини қарши елип, " албанийә һөкүмитиниң бу һәрикити, наһайити муһим бир инсанпәрвәрлик һәрикәт болди" дәп көрсәтти.

Шундақла албанийә ташқи ишлар министирлиқи бу 5 нәпәр уйғурниң албанийигә сақ-саламәт йетип кәлгәнликини етирап қилип, бу уйғурларниң албанийидә сиясий панаһлиқ тилигәнликини, шуңа уларниң һазир бу һәқтики қануний рәсмийәтләрни давамлаштуриватқанлиқини ейтти.

Бу мунасивәт билән америка уйғур бирләшмисиниң рәиси нури түркәл вә гуәнтанамодики уйғурларниң адвукати сәйбин вәллит албанийигә қарап йолға чиқти. Һәр иккилиси бу уйғурларниң қоюп берилгәнликидин интайин хушал болғанлиқини һәмдә мусулман дөлити болған албанийиниң бу уйғур мусулманлири үчүн наһайити мувапиқ җай икәнликини билдүрди.

Гуәнтанамодики 22 нәпәр уйғурниң ичидә бәши өткән җүмә күни америка һөкүмити тәрипидин қоюп берилип албанийигә йолға селинған. Әслидики пиланда 8‏- май күни буларниң арисидики 2 уйғур үстидин америкида сот ечилмақчи иди. Әлвәттә уларниң балдур қоюп берилгәнлики сәвәбидин бу сот бикар қилинди. Нөвәттә гуәнтанамодики қалған 17 нәпәр уйғур тезрақ әркинликкә чиқишни күтмәктә. (Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.