Amérika, gu'entanamodiki Uyghurlarning insaniy mu'amilige érishishi üchün küchigenlikini bildürdi

Amérika dölet mudapi'e ministirliqi gu'entanamodin qoyup bérilgen 5 neper Uyghur heqqide bayanat bérip, amérika hökümitining bu Uyghurlarning insaniy mu'amilige érishishi üchün eng chong tirishchanliqlarni körsetkenlikini bildürdi.

Mudapi'e ministirliqi bayanatida, "bizning asasliq nishanimiz, bu Uyghurlar üchün ularning hayatini qayta bashlaydighan bir muhit yaritish. Bu muhitni del albaniye yaritip béridu" dédi. Amérika tashqi ishlar ministirliqimu albaniyining bu Uyghurlarni qobul qilishini qarshi élip, " albaniye hökümitining bu herikiti, nahayiti muhim bir insanperwerlik heriket boldi" dep körsetti.

Shundaqla albaniye tashqi ishlar ministirliqi bu 5 neper Uyghurning albaniyige saq-salamet yétip kelgenlikini étirap qilip, bu Uyghurlarning albaniyide siyasiy panahliq tiligenlikini, shunga ularning hazir bu heqtiki qanuniy resmiyetlerni dawamlashturiwatqanliqini éytti.

Bu munasiwet bilen amérika Uyghur birleshmisining re'isi nuri türkel we gu'entanamodiki Uyghurlarning adwukati seybin wellit albaniyige qarap yolgha chiqti. Her ikkilisi bu Uyghurlarning qoyup bérilgenlikidin intayin xushal bolghanliqini hemde musulman döliti bolghan albaniyining bu Uyghur musulmanliri üchün nahayiti muwapiq jay ikenlikini bildürdi.

Gu'entanamodiki 22 neper Uyghurning ichide beshi ötken jüme küni amérika hökümiti teripidin qoyup bérilip albaniyige yolgha sélin'ghan. Eslidiki pilanda 8‏- may küni bularning arisidiki 2 Uyghur üstidin amérikida sot échilmaqchi idi. Elwette ularning baldur qoyup bérilgenliki sewebidin bu sot bikar qilindi. Nöwette gu'entanamodiki qalghan 17 neper Uyghur tézraq erkinlikke chiqishni kütmekte. (Peride)