خىتاي ئالبانىيە ھۆكۈمىتىدىن 5 ئۇيغۇرنى قايتۇرۇپ بېرىشنى تەلەپ قىلدى


2006.05.08
Share on WhatsApp
Share on WhatsApp

خىتاي دۈشەنبە كۈنى ئالبانىيە ھۆكۈمىتىدىن گۇەنتانامودىن قويۇپ بېرىلگەن 5 نەپەر ئۇيغۇرنى خىتايغا قايتۇرۇپ بېرىشنى تەلەپ قىلدى.

ئامېرىكا بىرلەشمە ئاگېنتلىقىنىڭ خەۋەر قىلىشىچە، خىتاينىڭ ئالبانىيىدىكى باش ئەلچىسى تيەن چاڭچۈننىڭ ئالبانىيە ھۆكۈمىتىگە يوللىغان باياناتىدا، بېيجىڭ ھۆكۈمىتىنىڭ بۇ بەش نەپەر ئۇيغۇرنى دەرھال خىتايغا قايتۇرۇپ بېرىشنى تەلەپ قىلىدىغانلىقى كۆرسىتىلگەن. شۇنداقلا ئۇنىڭدا بۇ ئۇيغۇرلارنى "خىتاي پۇقرالىقىدىكى 5 نەپەر تېررورچى" دەپ سۈپەتلىگەن.

خىتاي ھۆكۈمىتى باياناتىدا يەنە، ئالبانىيە ھۆكۈمىتىنىڭ بۇ ئۇيغۇرلارغا سىياسىي پاناھلىق بېرىشىگە كۈچلۈك قارشى چىقىدىغانلىقىنى بىلدۈرۈپ،" خەلقئارا قانۇنلار بويىچە، بۇ كىشىلەر خىتايغا قايتۇرۇلىشى كېرەك" دېگەن. ئالبانىيە ھۆكۈمىتى بولسا، نۆۋەتتە بۇ ئۇيغۇرلارنىڭ سىياسىي پاناھلىق ئىلتىماسىنى قوبۇل قىلغانلىقىنى، ھازىر قانۇنىي رەسمىيەتلەر بېجىرىلىۋاتقان بولۇپ، بۇ جەريانغا 2 ئايدەك ۋاقىت كېتىدىغانلىقىنى بىلدۈردى.

بۇ ئۇيغۇرلار 2001‏- يىلى ئامېرىكىنىڭ ئافغانىستاندا ئېلىپ بارغان ھەربىي ھەرىكىتىدە قولغا ئېلىنىپ، ئامېرىكىنىڭ گۇەنتانامودىكى تۈرمىسىگە سولانغان ئىدى. كېيىن ئامېرىكا ھۆكۈمىتى ئۇلارنىڭ تېررورىست ئەمەسلىكىنى كۆرسىتىپ، ئۇلارنى " خاتا ۋاقىتتا خاتا جايدا تۇرۇپ قالغان" گۇناھسىز كىشىلەر دەپ ئېلان قىلغان. گەرچە ئامېرىكا بۇ 22 نەپەر ئۇيغۇرنى ئامېرىكىدا ئېلىپ قېلىشقا قوشۇلمىغان بولسىمۇ، لېكىن ئۇلارنى ئۈچىنچى بىر دۆلەتكە ئەۋەتىشكە تىرىشقان. نەتىجىدە ئۇلارنىڭ ئارىسىدىكى 5 ئى جۈمە كۈنى ئالبانىيە ھۆكۈمىتى تەرىپىدىن قوبۇل قىلىنغان. ئالبانىيە ئىچكى ئىشلار مىنىستىرلىقى ھازىر بۇ ئۇيغۇرلارنىڭ ئالبانىيە پايتەختى تىرانانىڭ سىرتىدىكى بىر مۇساپىرلار مەركىزىگە ئورۇنلاشتۇرۇلغانلىقىنى بىلدۈردى. (پەرىدە)

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.