Xitay albaniye hökümitidin 5 Uyghurni qayturup bérishni telep qildi


2006-05-08
Share

Xitay düshenbe küni albaniye hökümitidin gu'entanamodin qoyup bérilgen 5 neper Uyghurni xitaygha qayturup bérishni telep qildi.

Amérika birleshme agéntliqining xewer qilishiche, xitayning albaniyidiki bash elchisi tyen changchünning albaniye hökümitige yollighan bayanatida, béyjing hökümitining bu besh neper Uyghurni derhal xitaygha qayturup bérishni telep qilidighanliqi körsitilgen. Shundaqla uningda bu Uyghurlarni "xitay puqraliqidiki 5 neper térrorchi" dep süpetligen.

Xitay hökümiti bayanatida yene, albaniye hökümitining bu Uyghurlargha siyasiy panahliq bérishige küchlük qarshi chiqidighanliqini bildürüp," xelq'ara qanunlar boyiche, bu kishiler xitaygha qayturulishi kérek" dégen. Albaniye hökümiti bolsa, nöwette bu Uyghurlarning siyasiy panahliq iltimasini qobul qilghanliqini, hazir qanuniy resmiyetler béjiriliwatqan bolup, bu jeryan'gha 2 aydek waqit kétidighanliqini bildürdi.

Bu Uyghurlar 2001‏- yili amérikining afghanistanda élip barghan herbiy herikitide qolgha élinip, amérikining gu'entanamodiki türmisige solan'ghan idi. Kéyin amérika hökümiti ularning térrorist emeslikini körsitip, ularni " xata waqitta xata jayda turup qalghan" gunahsiz kishiler dep élan qilghan. Gerche amérika bu 22 neper Uyghurni amérikida élip qélishqa qoshulmighan bolsimu, lékin ularni üchinchi bir döletke ewetishke tirishqan. Netijide ularning arisidiki 5 i jüme küni albaniye hökümiti teripidin qobul qilin'ghan. Albaniye ichki ishlar ministirliqi hazir bu Uyghurlarning albaniye paytexti tirananing sirtidiki bir musapirlar merkizige orunlashturulghanliqini bildürdi. (Peride)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet