Gu'entanamodin qoyup bérilgen Uyghurlarning adwokati seybin amérikini eyiblidi

Albaniye paytexti tiranadiki döletlik musapirlar merkizi. Gu'entanamodin qoyup bérilgen Uyghurlar mushu yerde turmaqta. 2006-Yili 10-may. AFP

Amérikining gu'entanamodiki türmisidin qoyup bérilip, albaniyige ewetilgen 5 neper Uyghurning adwokati seybin willét düshenbe küni amérika hökümitining bu Uyghurlarni til jehette héchqandaq ortaqliqi bolmighan albaniyige ewetishini toghra körmidi.

Amérika birleshme agéntliqining xewer qilishiche, seybin willét mezkur agéntliqqa " amérika hökümiti peqet albaniye bilen bolghan yéqin dostluq munasiwitidin paydilinip, béshidiki bir ghemni yoqitishqa tirishti" dédi. Gerche seybin willét albaniye hökümitining bularni qobul qilishning bir insanperwerlik heriket ikenlikini teripligen bolsimu, lékin u, bu Uyghurlarning öz tili bilen sözlishidighan Uyghur jem'iyiti we a'ile tawabatliri yoq ehwalda, til jehette héchqandaq ortaqliqi bolmighan albaniyide yashishining teske chüshidighanliqini éytti.

Adwokat seybin willét amérikidiki Uyghurlar we Uyghur teshkilatliri bilen bir pikirde, amérika hökümitidin ularni amérikidiki Uyghur jem'iyiti arisida yashashqa yol qoyushni telep qilghan idi. Lékin amérika hökümiti afghanistanda tutqan bu uyghularning amérikida qélishigha qoshulmay, üchinchi bir döletke ewetishni qarar qildi.

Lékin amérikining gu'entanamodiki Uyghurlarni ewetish üchün sözleshken bir qisim gherb elliri hetta türkiye qatarliq döletler bu Uyghurlarni qobul qilishni ret qilghan idi. Amérika dölet mudapi'e ministirliqi jüme künidiki bayanatida, bu 5 neper Uyghurning musulman döliti bolghan albaniyide yaxshi hayat köchüridighanliqini körsetken. Chet'ellerdiki Uyghurlar hemmidin, amérika hökümitining bu Uyghurlarni xitaygha qayturup bermigenlikidin we ularning erkinlikke chiqqanliqidin xushal bolushti. Xitay hökümiti izchil amérikidin bu Uyghurlarni xitaygha qayturup bérishni küchlük telep qilip kelgen idi. (Peride)